Tos les Bedjes el kinoxhnut : Raoul Hedebouw. Cist ome la, il est l’ poite-messaedje do PBB (Pårti do Boutaedje Bedje), yeyet nén s’ prezidint k’ est Peter Mertens. Cisse pårti la, dinltins marxisse, est divnou, avou l’ tins, soulmint on sopoirteu d’ ene democraceye comunisse. Li diferince etur les ideyolodjeyes la, ç’ est k’ el prumire vout l’ dictateure dås bouteus (å moens « de jure »), mins el deujhinme vout ene democraceye avou sacwantès ideyes do comunisse. Houte di çoula, cisse mouvmint politike la, il est po l’ ecolodjeye politike eyet ene Beldjike beldje, dj’ ô bén sins trepådje etur les Brusselwès, les Flaminds, les Tîxhons-cåzants eyet les Walons. Raoul Hedebouw est ene djin foirt enondiveuse come des ôtes noveas politikis come Georges-Louis Bouchez ubén Tom Van Grieken. Li camaeråde Raoul, tot dimanant amiståve, ni comprind nén l’ Beldjike.
D’ aboird, el Beldjike est on payîs, mins ele n’ est nén ene nåcion. Nosse payîs est divizé e troes : li Flande, li Walonreye yet l’ Coron-Estat[1] di Brussele. Vos n’ davoz k’ a rwaitî les liveas des votaedjes. 40 å cint des vijhéns do Bijhe avént voté po des pårtis conservatisse yet flamingants, contråvmint al Walonreye wice les djins votnut po des pårtis d’ pus e pus gåtchisse yet ecolodjisse. Minme si l’ « pévédéya »[2] — l’ no do PBB e neyerlandès — a cnoxhou on crama ascoxha, les rizultats dimannut pitits cwand on rwaite avou les cis k’ el PBB a yeu e Walonreye. Di pus, cisse pårti la n’ est nén prezint a Neyåw et tchik et tchak.
Adonpwis, li PBB est mierseu dins s’ cogne. Eviè Nonne, li PS ey Ecolo avént preferé d’ fé on govienmint avou li MR. Poirtant, Raoul Hedebouw n’ s’ aveut djamåy håyné di caegn evier les socialisses, veypus[3] avou les ecolodjisses. Do costé do noer liyon, l’ pårti d’ radicale gåtche est ossu pitit k’ Hestape. Do côp, i gn’ a pont di tchance po trové èn aloyî. Cwand on rlouke å livea federå, les socialisses eyet les ecolodjisses des deus costés n’ ont nén cachî après les camaerades. I fåt dire k’ ç’ esteut pus malåjhey po awè septante-shijh plaeces so les cint-céncwante disponibes. Il åreut falou aveur l’ aidaedje des catolikes bijhreces avou les umanisses nonnreces. Ces deus orandjes pårtis sont, cwand minme, pus lon del ideyolodjeye disfindowe på nosse camaraede Raoul Hedebouw ey ès binde.
Motoit bén ki dji va m’ repeté, mins èn avni avou l’ Beldjike est ene flåwe. Nén soulmint å livea del nåcion, des votaedjes yet des aliyances politikes, mins eto å livea del tcherpinte då pårti comunisse. Dins l’ adéyène[4] d’ èç pårti, li Beldjike est foirt ancrêye, come çoula est avou les Liberås Democrates (LD) — ancyinnmint « Liste Destexhe », ki vout yesse li N-VA francès-cåzante yet bedjofile — mins ossu, come çoula esteut avou li Pårti do Peupe — k’ aveut stî askepyî på Mischael Modrikamen e 2009 ki l’ a dismantchî, li dijhnêye shuvante, padri awè fé berwete. Li Pårti do Peupe est l’ minme djinre do pårti k’ el LD. Tenawete, li dierin est moens populisse. Mischael Modrikamen voleut, sorlon ses dires, candjî li Beldjike, mins sortoit li Walonreye yet Brussele. Cist ome la a ene vuzion ledjirmint beldjikine[5] des tchôzes, minme s’ i s’ pårti n’ esteut nén prezint e Flande pindant s’ vicaedje. Cisse flotche la est riprijhe på Raoul Hedebouw, k’ i croet a ene grande Beldjike. Si croeyance vénreut då fwait k’ ç’ est on lidjwès avou des oridjinnes flamindes. Ele vénreut eto då fwait ki mwints d’ ôtes mimbes do PBB sont des Flaminds ki boutnut e Walonreye et tchik et tchak ; på egzimpe, Sofie Merckx, ene doctoresse d’ Anverse boutant e Tchålerwè u core Germain Mugemangango, on Brusselére[6] ki vike dins l’ 6000.