Al Sinte Catrène, tot bwès prind rcinêye

Al Sinte Catrène, tot bwès prind rcinêye
Li Rantoele  2,
Al Sinte Catrène, tot bwès prind rcinêye

Di l’ arîre-såjhon, djusk’ å prètins, c’ est l’ momint d’ planter des åbes. Ci djèsse la est dabôrd ene manîre simbolike di mostrer k’ on a do coûr po l’ nateure. C’ est leye ki nos fwêt viker, è tchandjant li gâz carbonike (CO2), ki vint des ujhenes et des moteûrs, èn ocsijène (O2), ki l’ ome a dandjî po viker. E plantant, on mostère ossi l’ bon ègzimpe, avou tos les djins d’ on ptit payis come li nosse, a tos ces distrûjheûs d’ bwès la, ki disbwèjhlèt l’ tere. Il est grand tins d’ èspêtchî les dèsêrts di crèxhe, è l’ Azeye come è l’ Afrike et d’ èspêtchî les promoteûrs di distrîxhî tote l’ Amèrike do Sud.

Mins rivnans dins nosse pitite Waloniye et tchûzixhans l’ åbe ki convint a nosse pitit ou don grand bokèt d’ corti :

Dins on ptit djârdin d’ agrèyemint ki n’ conte ki kékes âres, come on-z è trove bråmint dins les vèyes, i fåt planter des åbes ki n’ crèxhèt nén trop hôt. Il ègzistêye a l’ eûre d’ ènute des variètés d’ plane, di bèyôle et d’ frinnes ki n’ dispassèt måy 5 mètes di hôteûr. Les horticulteûrs ont trovu è l’ Amèrike, et ossi dins les payis Scandinâves, des variètés ki dmeurèt ptites. Mins ç’ côp la, èlle ont des fouyes di deûs coleûrs, fwärt bèles a rwêtî : des vètès fouyes a djäne bwärd, et minme a blanc et rôze bwärd. Des ôtes åbes ont des fwärt bèlès fleûrs o prètins, et mwintès variètés, asteûre, sitindèt leûs brantches come on parasol. Il est tossi bea ossi di planter on åbe a frût, a basse tîdje (= bodje); cwand il est bén rcèpé, i dène des bèlès fleûrs o prètins, di l’ ombrîre è l’ èsté et des frûts è l’ arîre-såjhon.

Si on-z a, padrî si måjhon, on pus grand corti, al campagne, ou sol bwärd del vèye; on pout tûzer d’ î planter kékes åbes a frût. D’ après l’ pläce et l’ lårdjeû k’ on-z a, on pout tchûzi ètèr 3 hôteûr d’ åbe : les hôtès-tîdjes (ou bodjes), les dmèyès-tîdjes (bodjes) et les bassès-tîdjes (bodjes). Les åbes hôtès-tîdjes ont dandjî di branmint d’ pläce. Leûs coxhes ni dèmarèt del tronce k’ a deûs mètes di têre et si stindèt so les costés, djusk’ a 5 mètes di lådje di ttåtoû d’ l’ åbe. I n’ fåt adon n’ è planter ki tos les 10 mètes. Les dmèyès-tîdjes, zèls, divèt èsse plantés tos les 8 mètes. Ça vout dîre k’ i fåt del pläce et atinde 10 ans dvant d’ avu des frûts. So les bwärds des paxhis, i dmeûre del pläce po-z î mète des côriyes, des sîzons, des gruzalîs et des åbes a frût bassès-tîdjes, ki pwärtèt do côp.

Cwand on-z-a l’ tchance d’ avu on parc, on grand paxhis oudon ene prêriye, on pout sondjî a planter des grands åbes. I dnèt d’ l’ ombrîre ås djins come ås biesses e l’ èsté, et mintni del cruweû, ahuter les oûjheas et rabeazi l’ payizädje; li tiyoû et l’ blanke sipène sont si beas cwand i florixhèt. Les djayîs, les maronîs, les hesses dinèt leûs frûts ossi bén ås djins k’ ås skirons. Li bèyôle, leye, est tchuziye po si blanke schwäce. Dins on pré bagnî pa on ruchê, oudon moyî pa on frèchê, tûzans d’ î planter ene ônea, on tronle [tremble] ou on « blanc bwès »

Les idêyes ni mankèt nin, mins çu ki conte, c’ est k’ l’ arîre-såjhon vnuwe, on done l’ idêye a tos les djins del têre, di planter on åbe.

Note Wikisourd

Eplaidî dins l' Rantoele di l' ivier 1996/1997 p. 8, avou kékes mots ratournés e francès.