Ni mi d’mande pus di m’ sov’nu,
N’assaye nin di m’ fé comprinde,
Laî m’ mi r’pwaser.
Mosteure qui t’è-st-avou mi,
Done mu on p’tit bètch è m’-n-anète,
Prind mès mwins dins lès tènes.
Dji so règrignîye, rascrauwéye èt foutuwe,
Tot ç’ qui dj’ sé co,
C’èst qu’ dj’a dandjî d’ twè.
C’est que j’ai besoin de toi.
Prind pacyince avou mi,
Ni djure nin, n’awe nin, ni tchûle nin,
C’èst nin di m’ faute, dji n’è pou rin.
Minme si dj’ sâye di m’ sov’nu,
Dji n’î arive pus,
Mins dj’a todi dandjî d’ twè.
Dj’a pièrdu tot ç’qui dj’aveû d’ mia,
Achid’ twè à costé d’ mi,
Èt veû-m’ voltî jusqu’à m’ vacha.
Djè l’a todi conu,
Courant pa tos costés, po bouter,
Èlle a télemint d’né,
Èlle a télemint tûzé,
Qu’one plauque à tchaît d’ssu…
Dispiète-ti baudèt
Drove tès-ouys
Drove ti tièsse,
Drove ti keûr,
Dispiète-tu grosse bièsse
Poqwè todi tûzer
À tès sov’nances, à t’ planète,
T’as bouté ayîr po t’astamper.
Asteûre, ti voureûs fé place nète ?
Sârè-s’ co bin viker sins lèye ?
Minme sitèvôye,
Èlle èst todi dins t’ tièsse
Èlle èst todi dins t’ keûr,
Èlle èst todi pad’vant tès-ouys
Èlle èst binauje dins si stwèlî,
I t’ faureût bin dès pènas,
Po-z-aler veûy vélà,
Po sayî comprinde ci qu’èlle a !
Vingt’ cinq ans passés avou lèye,
Vos v’s-avoz tant vèyu voltî,
Faut sûr nin qui t’ lès rovîyes,
Mins ni d’more nin prij’nî…
Qwè qu’on-è dîye
Qwè qu’on-è pinse,
Ou bin ti r’cules, ou bin t’avances,
Prind tès-ayîrs come dè l’ chance !
Audjoûrdu, s’èle n’a pus s’ tièsse,
Ni rovîye jamais, vîye bièsse,
Qu’èle t’a chapé on djoû,
Qu’ ti n’ valeûves pus on gros soû !
Quand nos-èstîn’ priyîs d’on costé ou l’ôte,
À on mariadje,
On-ètêremint,
È voyadje :
I-gn-aveût todi one djin ou l’ôte,
Qu’acoureûve ad’lé lèye,
Come à l’ fièsse,
Come à mèsse,
Come à cofèsse.
Èle mi laîyeûve ratinde d’on costé ou l’ôte,
Po choûter,
Po cofèsser
Leûs miséres.
Fé one crwès d’ssu leûs bratches à onk ou l’ôte.
Dji d’meure pièrdu d’on costé ou l’ôte !
Asteûre qui s’ tièsse è pièrdûwe d’on costé ou l’ôte,
À l’ maujone di r’pôs,
Au trwèzyinme
Dins s’ tchambe,
Dins l’ colidor.
Èle pormwinrne one malade come lèye,
D’on costé à l’ôte.
À l’ bèsognî,
À fé leû mârtchi,
Vélà, catchîyes,
Po-z-achèvé leû vikairîye ?
Bon Diu d’ Bon Diu,
On l’ sét bin qu’i faut moru,
Mins poqwè deûs côps djondus,
Dji d’meure pièrdu d’on costé come di l’ôte !
C'èst bin vos què l'a dit :
« Ni m' sère nin tès paupîres,
tant qu' dj'a tès-ouys, dj'a dè l' coleûr ! »
C'èst bin vos què l'a dit :
« Veûy voltî ; c'èst trop por mi,
done-m'è sins lès sofrances ! »…
Qwè pou-dj' co fé asteûre ;
qu'one crapuleûse bièsse
a prins tote vosse tièsse ? …
C'èst bin vos què l' dijeûve :
« Dji veû voltî l' solia, l'èsté,
Quand nos p'lans danser ! »
C'èst bin vos què l' dijeûve :
« Dji conè l' fè qui nos faît viker,
l'èsté, ti vwès, nos tchôdès carèsses ! »
Qwè pou-dj' co fé asteûre ;
qu'one crapuleûse bièsse
a prins tote vosse tièsse ? …
Dji tchante tot seû…
Dj'ètind co vos tchansons
qui findenut m' keûr.
Dji sin co vos dwègts
qui r'pingnenut mès tch'vias.
Vosse planète si cotwad dins vos paumes.
Sins vos mwins, dj'a pièrdu m' vôye.
Dji tchûle tot seû…
Mins por vos, dji n' vou nin co moru
come li dêrin bètch qui v's-avoz r'ssintu.
Dji tchûle tot seû…
Vos n' mi saroz pus jamaîs dîre :
« Po fièster nos-ans
do timps d' l'awan,
arindje mi dès tchandèles
è rond di stwèles,
mi-y-ome ti d'vins vî,
mins dji t' veû todi voltî. »
Dji tchûle tot seû…
Vos n' mi compurdoz pus quand dji v' di :
« Qui t'ès lon èri d' mi,»
Mi p'tite blame, clawèye dins li stwèlî…
Alzheimer/II
Ciste ouve ci egzistêye eto divins ds ôtès ortografeyes : Rifondou walon.Alzheimer