Li « covûd19 » dès Polonès a d’chindu d’on’ avion à Gochelîye aviès nouve eûres èt d’méye. Il èst branmint pus castârd qui l’ cia dès-Anglais. I-gn-a pont d’ôte tchwès qui d’ vos fé stitchî au pus rade.
Di ç’ maniére la, vos n’âroz pus dandjî d’awè peû dè l’ « covid20 » qu’arive di Marseille aviès 21 eûres èt dè l’ cia qui va tchaîre à passète, po dimègne divant prandjêre, èt qu’a stî lachî à prëme à Vodkarouskî è l’ Russîye. Insi, vos f’roz deûs côps dè l’ minme awîye.
Li cia dès-amèrikins nè l’ djoûwe pus come nos, dispôy qu’i s’ sièv’nut dè l’ daube di poûre à chnik èt bwêre di laîwe da Javel !
C’èst l’ minme afêre po l’ cia dès-Anglès, à fwace di sporner dins l’ plôyant d’ leû coûde, i n’ passe pus l’ mantche !
Li cia dès Chinwès, faut nin rovî qu’ c’èst d’ vélà qui provègnenut tortos, pouroz co bén s’ fé priyî ad’lé nos, tot passant pa l’ 5G. Pont d’avance di vos fé stitchî, télemint qu’i va rade, vos n’ènn’aroz pus po lonmint ; sûvanmint lès bèrdèladjes dès spécialisses dissu vosse tévé. (one cope d’eûres, one véntin.ne di minutes, on stoump, on pèkèt èt dès rawètes.)
Po l’ « covûd21 » dès Walons, vos sèroz chapé après chî mwès :
- si vos r’ssèroz vosse tévé,
- si vos-avoz one boune cauve avou dè l’ boune bîre di mwin.ne. (Minimom, di qwè ténre chî mwès)
- si vos d’morez rèssèré come i faut è vosse maujone, sins vos porminrner à l’ plaîve, à l’ nîve, au solia, èt dins lès ouféyes di vint.
- si vos-èstoz capâbe di sopwârter on masse come lès cias dès « Blancs Moussîs » po l’rèstant d’ vosse vikaîrîye.
Tot ça ; c’èst po vosse bén. Nos boutans tortos au pus fwârt po qu’ vos fuchiche capâbe di mèriter lès djins à quî qu’ vos v’ p’loz fiyî !
Li bèdot d’ocasion.