Tot rivnant e l’ Walonreye ‒ dji so-st on Walon espatriyî ‒ e moes d’ octôbe 2021, dji scrijha-st on powinme po critiker les grigneus.
I fourit rprins dins l’ gazete « Singulîs » 1/2022.
Ça, dispu septante-cénk ans d’ tins.
Dj’ aveu yeu l’ toirt di n’ nén plaidî l’ afwaire avou nosse Vladimir Poutine. Mins, tot rabatou, si dj’ l’ åreu yeu houkî å telefone, ki m’ åreut i dit ? « Oyi, scrî lu ! Dji va djusse fé ene tote pitite tournêye e l’ Oucrinne. Ût djoûs, candjî d’ govienmint et c’ est tot ! Ci n’ serè nén, po dire, ene grande guere. »
Portant, il î sont co. Eyet, rén k’ tot-z acontant les distrujhaedjes et l’ disbrôlaedje economike, dji dvrè ritoirtchî m’ rimea insi :
Di cwarante-cénk disk’ å prétins.[1]
Kimint k’ les ptits Oucrinnyins n’ ont nén stî språtchîs come des wandions, totenoncô ? Ni l’ Urope, ni l’ Amerike ni plént moussî direk e djeu d’ beyes, peu del bombe atomike. Mins foû do tchamp d’ bataye, on-z a veyou on Zelinsky foirt bon cåzeu et foirt coraedjeus, disconte d’ on Poutine pé k’ on boû d’ fagne. Et toursiveus, et sins fiyate a-z aveur a lu.
D’ ene trake, les Bedjes ont rçû les efuyîs. On a djåzé d’ trinte meye ascoyeus, måjhons, djîsses e viyaedje, institucions. Les Oucrinnyins passént å Ptit Tchestea, pu a l’ avrûle å Heysel, et-z awè d’ on côp leu cwåte A, et les çanses ki vont avou. Oyi, mins : brokete di bos po les etrindjirs efuyîs d’ Oucrinne (bråmint des studiants noers et arabes). Sami Mehdi : « Alez rzè dins vosse payis. I n’ est nén e l’ guere, lu. Vos av 30 djoûs. »
sicrît li prumî d’ djun