Dispôy deûs djoûs Moûse est sèrêye èt i fêt on freûd d’ diâle ! Li payis èst blanc d’zos l′ nîvaye. Lès p’tits-oûhês n’ savèt wice moussî. Lès cwèrbâs, zèls, toûmikèt avâ l’ campagne atot crêksant.
Èt d’vins lès hôtès cohes dès-âbes, i bîhèye qui po-z-assoti !
A Indjihoûl, ine tchèrète di baraquîs, tote dilâburnêye èt qui n’ tint pus pèces èssonne, s’a-st-arèsté.
L’ome, on grand crolé neûr, a distèlé li dj’vâ. Èt, lèyant veûy dès cwèsses come dès cèkes di tonê, il pôve bièsse, qui n’ pout câzî pus hop’, pèle avou ses dints lès bouhons d’âtoû d’ là.
Tot près dè pont dè rèw, deûs gamins à gngnos soflèt di leû pus fwèrt et s’ fèt souwer à gotes po-z-èsprinde dès cohètes qui n’ volèt nin blâmer.
Ad’lé zèls, leû mame, achowe so ‘ne tchèyîre qui n’a qu’ treûs pîds, avou on hopê d’ wèzîres so s’ hô, oûveûre âtoû d’ine banse.
Acropowe conte il rowe d’ine tchèrète, avou so sès spales on grand vilin surtout d’ sôdârd, ine vîle feume, sûr’mint l′ mére d’à l’ome, foume divins ‘ne coûte pîpe di têre et disploum’têye li crâsse poye qu’èlle a hapé atot passant â matin è viyèdje di Ramèt.
C’est lèy qui tape lès cwâtes divins lès fièsses dè l′ Condroz. Èle passe po-z-avu pus d’ nonante ans. Ine twèche di gris dj’vès pind foû di s’ mâssî bonèt, et l′ vint fêt toûrniker âtoû d’ lèy lès ploumions dè l′ poye qu’èle tint d’vins ses bètchous deûts.
Avâ tos zèls, ine aguèce, lès-éles ricôpêyes, potch’têye èt dâre tos costés. Et po l’ouh, on veut, â d’vins dè l′ tchèrète, on pôve vî mârticot racrapoté divins ‘ne vîle camisole, et qui higne atot tossant.
Èt, drèssî à mitan dè l′ vôye, lès deûs brès’ creûh’lés, l’ome avou ses vèrts-oûy di tchèt louke è hôt dizeû Moûse ine binde di sâvadjes canârds qui fèt volêye de costé dè solo.
Parexhou aprume dins l' gazete « Li Spirou », 11inme anêye, l° 33 do 2 d' djun 1898, 1898, pp. 215-217, riprins divins « Ecrits wallons de François Renkin », Lidje, 1906, pp. 45-47