On traeyin so si spale, mi papa aléve co sovint naxhter e bwès. A longuès ascoxheyes, passéve inte les sapéns po-z aler so l' crestea, la k' n aveut des faws.
Dj' el veya rivni on djoû al brune, tot hertchant ene grosse faxhene a s' cou et on saetch di schoices, mitan so si spale, mitan so s' traeyin. Leya toumer s' tchedje al tere, distela l' coide ki loyive li faxhene et s' ashida so l' soû po s' rischaper ene miete. Ashiou avou lu, dji n' dimora nén coe bén do tins, et dj' el fijha-st assoti po k' i m' fwaiye potchî e l' air so s' djino, come a cavale…et i s' meta-st a tchanter so l' cadince del muzike :
Roum dou doum, Colas Roubin,
vosse tabeur ni va nén bén,
vosse meskene ni sait danser,
vosse vårlet n' el sait moenner.
A tos côps, s' djino m' evoyive e l' air et dji xhaxhléve di tot m' cour…
- Eco ene feye, papa ! eco ene feye !
Tot d' on côp, i s' aresta, naxhta e s' potche…
- Sepoz vs bén kî dj' a rescontré ? dmanda-t i
- Kî don, popa ?
- Dj' a rescontré l' coucou, et i m' a dit : "N' avoz vs nén on ptit efant ?" "O awè, Monsieu l' coucou, dj' a-st on ptit valet" "Adon, vos lyi poitroz çoula di m' pårt."
Et vola ki m' popa sôrtixha del potche di s' sårot, doûcmint, precieuzmint, come on trezôr, ewalpêye e-n on gris papî… ene tåte di noer pan a mitan souwêye, on pô racoirnêye…
So l' côp dimefiyant, dji hagna on ptit boket del betchete des dints, adon-pwis tote li tåte î passa, nén sins poenne, ca elle esteut ene miete deure…
- Est i bon l' pan do coucou ? mi dmanda-t i.
Mon Diu, k' c' esteut bon ! Bén meyeu k' nosse pan d' tos les djoûs !
Ouy, dji sai ki s' gosse, el diveut å feu - la ki m' popa aveut fwait cure ene petêye crompire et tchåfer s' cafè -, ås sapéns, ås moitès foyes, å maxhaedje di totes les odeurs do grand bwès.
tecse ratourné d' on live da Arsène Soreil.