On purdot in bon rosti d' bû (bœuf) et on l' mètot avu du bûre dins ène téle (terrine). Cand t' avoz coût, ku t'avos rsatchî tu coûtadje du four, tu rassan.nos les bréjes. Et on mètot l' téléye a coûre su les bréjes å dvant du four.
Pou-z årder toute la vapeûr dins la téle, on-z avot lêchî in ptit bokèt d' påsse du pwin et l' mète coume in jwint atère la téle et la coviête. C'ére dul påsse k' on-z avot fwêt avu dul farène et du lwin, putète des yèsses (levures).
Nosse man fjot ène påsse pou catôrze pwins, ca on coûjot pou kinze djoûs. Wête don k' on-z astot spårgnant : cand c' ére lu warnu (les canicules), les pwins tchamoussint, û bin fiyint. (faisaient des fils en se brisant).
Eh bin, nosse mére côpot les crousses et il nous oblidjot a mougni la mie. C' astot la crousse, don, ki tchamoussot.
Et on fjot du pwin su l' hasse (âtre) du four. On mètot la påsse din des wachês û des corbiyes (corbeilles en osier), k'on rtoûrnot su l' afournoule, pou les tiper dirèk su l' hasse du four Gn avot des åtes pwins ki dmèrint dins les pêlètes (formes à pain). Les pwins su l' hasse avint ène pu spèsse crousse, don, zèls..Ahy, pa des côps k' i gn avot ène bréje ki dmèrot aclapéye après, mês on la grètot, don et pîs ç' astot tout. On n' astot nin si nâreu k' anute, séss'.
Et cand on-z avot coût, on rmètot les bréjes a l'intréye du fou pou-z î pôser la téléye du bû al môde, pou l' ile coûje tout bin douçmint.
In four, ç' astot ène voûssure (voûte) du brikes k' on fjot 30-40 çantimètes pu hyôt ku l' hasse et k' on dmandot a in bon maçon du vnu fwêre. Duzeu, on mètot co ène boune supècheur du sâbe pou tnu tchôd..
Et c' est la tchaleur des brikes k' on-z avot bin tchåfé dvant ki coûjot lu pwin et pîs après, lu bû al mode.
Cand t' avos tout fwêt et ku la têle avot sté rèchuwe, tu lêchos in pô rafrèdi l' four duvant d' î rmète la nouvèle fawée pou la smwin.ne d' après. Ile avot insi l' timp d' bin sètchi pou fwêre ène boune flamée ki fjot bin l' tour du four et ruvnu al tchuminéye k' ére a l'intréye du four.
La fawéye, c' ére des chinètes d' du faw, d' hèsses, cwè, ku t' arandjos bin comifåt yène su l' ôte et ki souwint co avu la tchaleur des brikes, pou yèsse bin sètches pou la coûtéye a vnu.
Raconté pa Aline Brôlet, li 9 d' octôbe 2001.