Li novele mwaisse lwè mete tos les lingaedjes do payis come lingaedjes oficirs.
E moes djanvî 2005, Evo Moralès divneut li prumî prezidint indyin del Boliveye.
Dispu don, il a bouté bråmint po-z aveur ene mwaisse-lwè ki respectêye les droets culturels des peupes indyins. Mins les avancêyes economikes ont stî pus flåwes ki çou k’ ses vôtants avént ratindou.
On rvôte e moes d’ decimbe 2009. Li prezidint årè siconte di lu les « blancs » ki n’ lyi ont måy pardoné di n’ pus esse les mwaisses do payis. Il est sotnou pa s’ prôpe pårti, li Mouvmint Aviè l’ Socialisse (MAS). Si a-t i l’ aspoya des sindicalisses « payizans » do CSUTCB. Mins, so si hintche, il årè sconte di lu des mouvmints indianisses. Ces-ci lyi rprotchnut d’ aveur djusse candjî li politike capitalisse pa ene politike comunisse, mins rén fé po candjî li vicaedje di tos les djoûs di leus peupes.
Dispu l’ 15inme s., des Espagnols, des Djwifs Sefarådes, des Libanès, des Almands et des Crowates ont-st abagué sol Boliveye. I s’ ont dit : Vlans dj’ dizindjner ces Indyins la come les Estazunyins ont fwait avou les leurs ? Udon-bén les eployî come esclåves dins les fosses et les haswès (grandès cinses, haciendas). C’ est çou k’ il ont fwait. Ça n’ a waire candjî å dislaxhaedje do payis e 1835. Mins e 1952, al revintreye (revolucion) da Victor Paz Estensoro, les Aymaras et les Ketchwas s’ ont lomé les « payizans » : i cminçnut a-z aler a scole, i polnut vôter et i rdivegnnut mwaisses-tinants (prôpietaires) di leus teres.
Portant, culturelmint, gn a rén ki bodje : l’ espagnol est l’ seul lingaedje do payis et li seu modele di tuzance et d’ vicance, c’ est l’ ci do monde coûtchantrece.
Portant, dispu les anêyes 1970, gn a askepyî sacwants pårtis indyins « intelectuwels ». C’ est zels k’ ont fwait passer les lwès di 1994 ki ricnoxhèt les droets des cminåltés indyinnes di s’ govierner zeles-minmes et d’ eployî leus langues ki dvrént esse acsegnêyes e scole. Mins, come tofer, li scolaedje des langues do payis n’ a waire roté, paski les mwaisses di scole n’ avît nole håsse di l’ apliker.
E moes d’ octôbe 2003, li prezidint Gonzalo Sanchez de Losada vout vinde do gåz ås Estats Unis tot passant på Tchili (l’ innmi istorike del Boliveye). Les Indyins ni fjhèt ni ene ni deus : i dmandnut li fén do forpoujhaedje des ritchesses minreces. Et roter sol palå do prezidint ki dva såperter e-n elicoptere.
Moralès s’ a-st aspoyî so des ôtes payis siconte-americanisses come li Venezouwela eyet Couba po rarindjî les contrats avou les grandès societés di poujhaedjes des minrês et do gåz.
Mins si pus bele ovraedje, sins manke, c’ est l’ mwaisse lwè d’ octôbe 2008. Gn a yeu des mantches a mete po scrire cisse nouve constitucion la. Mins, al fén des féns, elle a passé et-z esse acceptêye pa referindom e moes d’ djanvî 2009.
L’ adrovaedje est scrît come po des belès-letes :
Dispu ki l’ monde est monde, gn ava des montinnes k’ aspitît foû d’ tere, des aiwes ki candjît leu schavêye, des grandès basses ki s’ rashonnît. Noste Amazoneye, nosse Tchaco, nosse Hôte Plinne [Altiplano], nos ôtes plins et nos ôtès vås verdixhît, et si stoeler d’ fleurs. Nos apeuplîs cisse tere la, nozôtes tertos, tchaeke avou s’ vizaedje, tchaeke avou ses dujhances et si prôpe tuzance.
Ça fwait ki l’ Boliveye, c’ est on seul Estat sociå, mins ki l’ Droet est l’ ci di sacwants cominåltés nåcionåles. (Prumî hagnon).
Adon-pwis, li mwaisse lwè va dner totès sôres d’ abondroets a ces cminåltés la, inte di zels, les droets teritoriås et l’ ci d’ eployî tos leus lingaedjes come deujhinme lingaedje oficir dilé l’ castiyan.
Eplaidî aprume cial so l’ Aberteke (avou sacwants fotos) ; li rfondou est ene miete ricoridjî vaici.
Djåclene Mitchåd (Jacqueline Michaux), c’ est ene etnolodjisse walone k’ a viké foû payis et ki boute po ene Soce Nén Recwårlante dins ene sicole d’ agricoûteure po des djonnes et des grandès djins aymaras après Oruro (Nôr-Ouwess del Boliveye).