Piron
Boune nute, Maroye ! boune nute, mi feye !
Cwand dji t’ rivoe, li coûr mi reye !
Kimint t’ poites tu ? Èss todi bén?
Por mi, gråce a Diè, dj’ a l' vinte plin
Maroye ou Crantche-e-coir
Ki li grand diåle ti rompe li cô !
Ni rvénrèss måy si ti n’ es sô ?
Dåné rénnvåt ! bougresse gobeye !
Måssî pourcea ! måsseye curêye !
Piron
O ! Ki t’ fåt i ? K’ ess ewaerêye !
N’ ass djamåy pus veyou ene sôlêye ?
Maroye
I n’ fåt nén k’ dj’ è våye cweri foû :
Dj’ end a e l' måjhon tos les djoûs,
Ine gen ki n’ firt ni côp ni make,
Ki n’ fwait k’ boere et prinde del toubak.
Piron
Ni t’ tairèss nén, di, dobe ribåde ?
Do moens, lai m’ la cwand dj’ so malåde !
Ass li diåle veyou a criyî ?
Ratind po l’ moens k’ dj’ åye rinådé !
Ba ba ba ba bå…
Ba ba ba ba bå…
Ay ! bon gros Diè ! ki dj’ a må m’ cour.
Rade do vinaigue ! vola ki dj’ mour !
Cour rade, Maroye ! cour vite, båshele !
Va s’ mi cweri d' l’ aiwe di caenele !
Maroye
Ki n’ rinådes tu tos tes boyeas,
Peumon, [[:wa:Wikt:golete|]] et totafwait !
Ca, ossu vraiy k’ on m’ lome Maroye,
Si dji n’ djètéve des låmes di djoye !
Piron
O ! dobe pitin ! Mins ki dj’ soeye moirt,
Pa les benots, s’ dji n’ vén foû d’ tere
Po t’ herer des pougn e grognon
Portant k’ t’ es cåze del moirt Piron !
Ou s’ dji forfwai don ene dimeye eure,
Dji t’ frè li coir tot pier, tot noer;
Si t’ kibouyrè dj’ tertote di côps,
Tant k’ dji t’ end åye diné tot m’ sô !
Marôye
Mour si ti vous, c' est mî tot don ![1]
Dji n' ireu nén ene pixheye lon !
Les efants
Binamé pere, dnez m’ a magnî !
Dj’ n’ a nén sopé, dji mour di fwim,
Et s’ n’ avans dj’ nén fwait a cwatre-eures
Atot m' grand fré vola, ki pleure !
Pîron
K’ av’ li diåle veyou tos afwait ?
O ! k’ a-dj’ èn årmå e m’ saetchea ?
Ki n’ so dj’ dåné tertot fén noer
Si vos n’ mel payroz totasteure !
flitch-flatch ! so tos afwait…
pif-pouf ! so tos afwait…
Maroye et ses efants breyèt
Å moudreu! å moudreu ! Ki t' a-t on fwait ?
Les efants
Binamé pere! binamêye mere !
Binamé pere ! binamêye mere !
Ayayayay !
Dji n' a rén fwait !
Et l' pere fwait todi flitch-flatch !
Pî-notes