I.
Hay, lèvans-nos, èfants dèl lîbe Bèljique,
On grand djoû d' fièsse po tos nos-ôtes survint.
Flaminds, Walons, d'on coûr franc, énèrjique
Mahans nos vwès po tchanter l'an qwate-vint.
Duspôy l'an trinte, nos viquans bin èssôle
Duzos lès lwès dèl sinte Fratèrnité.
Dunans-nos l' min, lu même fièsse nos rassôle
Å[1] bê solo dèl Lîbèrté.
II.
C'èst an lètes d'ôr qu'on d'vreût scrîre noste istwêre,
V'là céquante ans qu'on n'åye pus ètindou
L' canon dèl guêre so nosse bê tèritwêre
Qui, si sovint, du song′ a stu tédou.
Bèljes, nos polans èsse fîrs du nosse patrèye :
A l' tièsse dès-ôtes, ille a todi roté.
Ile veût flori lès syêces èt l'édustrèye
Å bê solo dèl Lîbèrté.
III.
César l'a dit : « Lès Bèljes sont plins d' corèdje »
I s' fèt k'hètchî po ruqwèri leûs dreûts.
Mês voci l' påye; louquîz-les à l'ovrèdje !
Lès-ovrîs bèljes sont co lès pus-adreûts.
A Londe, Paris, Viène èt Filadèlfèye
Lès prumîs pris, quî lès-a rèpwèrté ?
C'èst nosse Bèljique qui s' distingue èco ‘ne fèye
Å bê solo dèl Lîbèrté.
IV.
Quu d'évincions so cès annêyes passêyes;
Tot nosse payis est pavé d' bênes dè cîr.
Dès fis d'ârca su tchèrdjèt d' nos pinsèyes,
È-n-on clègne d'oûy, ile sont pus lon quu l' cîr.
Dè pôrt d'Anvèrs′, dès batês sins parèy
È vont chaque djoû pwèrter du tot costé
Lès drèps, lès-armes, lès tchîfs-d'oûve quu l' Bèlje crèye
Å bê solo dèl Lîbèrté.
V.
Duvins lès-ârts, duvins l' litérature
Lès Bèljes nin pus ni sont nin lès dièrins.
Scrîyeûs, pondeûs, grands-artisses an sculture
Su covrèt d' glwère, insi qu' nos musicyins.
D'vins chaque viyèdje, l'éstrucsion su duspåde,
Nos mêsses du scale éstrwits èt plins d' volté
Sèmèt on grin, l' peûpe rascoye one grosse pôte
Å bê solo dèl Lîbèrté.
VI.
Nos-èstans lîbes, nos rotans tièsse lèvèye,
Gråce à nosse bèle, nosse lådje constitucion.
Su quéque wèzin nos lûgne d'on-oûy d'èvèye
Dè monde ètîr, nos fans l'admiråcion.
Tchantans, mes frés, nosse brabançone majique,
Tot come l'an trinte, l'an qwate-vint veût floter
Lès treûs coleûrs dè drapô dèl Beljique
Å bê solo dèl Lîbèrté.