Ciste ouve ci egzistêye eto divins ds ôtès ortografeyes : Feller timprouFeller-Francard.
C’ est l’ prétins
rortografiaedje da Lucyin Mahin
Li Rantoele  105,

Ratacaedje

C’ est l’ prétins

Mondju todi ! la l’ solea k’ a rivnou. Adon, ci n’ est nén ene crake !

On pinséve k’ il esteut moirt mins dji l’ a veyou aponde [poindre]. Ey il a pris tot s’ timps, cåzu ene eure po fé les deus cints metes del voye a pî. Ci côp ci, c’ est vormint ene boune novele et dji va esse tote renondêye e fjhant l’ plin d’ vitamine D.

C’ est l’ prétins et les moxhons tchantèt ! Dji n’ va nén cwanlminme mi lever asteure. Dji va fé shonnance di rdoirmi. Il est bråmint trop timpe.

Miyård ! ci måvi la tchante a casser vos orayes. I fwait ostant d’ brut ki les bernatîs avou leu gros camion ås mannestés. Ça fwait ki dji n’ doime pus k’ d’ èn ouy. Adon dji m’ va lever. Il est li dmeye di shijh [5h.30]. Si va dj’ fé les schieles do djoû di dvant.

Al fén, c’ est ene bele muzike, li tchant do måvi !

Et do tins k’ dji fwai les schieles, nosse prétins tuze ossu. Pocwè ki ç’-t ivier ci, li tchet da Djozlene a croxhî l’ pîlåd [bouvreuil] do corti ? I gn av k’ onk, nodidjo ! Kéne afwaire a Lidje ! C’ est télmint bea on pîlåd ! Et l’ djåzrene [bruant jaune] ki s’ a vnou peter disconte li cwårea, et toumer la, roede moite. Dji l’ a-st eteré, avou ses djaenès plomes po s’ drap d’ essevleye [comme linceul].

C’ est l’ prétins. Les Ligustrum vulgare si fotèt d’ mi avou leus chichlotaedjes et leus rizêyes cwand dji rmonte li pazea. « Oyi m’ feye, nos vicans co. Bénvite, vos nos dvroz rabiner 2 metes hôt. Vos alez sofri ! »

C’ est l’ prétins. Li solea clegne des ouys, les moxhons zouplotèt a deus et les djetons s’ dismoussèt. Kéne merveye !

Note Wikisourd

sicrît li 21 d’ måss 2022. Li passaedje avou l' djåzrene a stî radjouté d' après on racontaedje del sicrijheuse e 2023.

]]