Chanson anti-boche

À la gloire de nos soldats, s.d.

[ 21 ]

CHANSON ANTI-BOCHE

(Air : Binamé St-Nicolêye)

Si dj’esteu mâye in’ All’mand
Dji m’traitreu d’mâci brigand
On bin d’Boche ou d’côpeu d’boûse
Ou d’voleur ou d’baligand.
Dj’âreu des r’mwérds tot m’louquant
Dji m’sitron’reu-st-à la douce
Si dj’esteu mâye in’ All’mand
Dji m’traitreu d’mâci brigand (bis)

II

Si dj’esteu mâye Hindenbourg,
I m’sonle qui dj’âreu l’broûle-coûr ;
Dji m’râyreu totes mes mèdayes,
Mes clâs vinrît-st-à leu tour.
On m’a fait trope di mamours ;
Dji m’direu : Dj’a r’çû n’belle daye.
Si dj’esteu mâye Hindenbourg,
I m’sonle qui dj’âreu l’broûle-coûr. (bis)

III

Si dj’esteu l’konprinz faquin,
Dj’âreu n’saqwè so les reins ;
Dji dîreu mes litanèyes
Ca dji tron’reu les balzins.
Dji m’direu : Dj’so-st-ènocint
Dj’el dimeurrè tote mi vèye.
Si dj’esteu l’konprinz faquin,
Dj’âreu n’saqwè so les reins. (bis)

[ 22 ]

IV

Si dj’esteu l’anchin Kaiser
À l’mustache qui bise è l’air,
Dji m’freu rik’mander timpesse
À m’camarâde Lucifer
Qui m’acceptèye è l’infer.
Elle est co trop bonne, li plèce.
Si dj’esteu l’anchin Kaiser
À l’mustache qui bise è l’air. (bis)

V

Mins dji so-st-on Belge po l’bon :
Dji tûse à mi p’tite Nâtion.
Ni djâsans pus d’kaiserlique,
Ca c’est-ine condanâtion,
Brèyans nost’admirâtion
Po l’grandeur di nosse Belgique,
Ca dji so-st-on Belge po l’bon,
Dji tûse à mi p’tite Nâtion. (bis)