On brût coûrt au payis dès canârds. « Abîye insi, i gn-a pont d’ timps à piète, disguîjez-vos tortos à pouyes. Ni taurdjez nin ! »
Fiant chonance did rin, come si dji n’éve rin ètindu, j’è va, tot hossant do cu èt tchampiyant quéques grin.nes pâr-ci pâr-là dins l’ vèt prè.
« Fwè » d’ canârd, dji n’aî rin pu fè quand deûs mwins grandes au d’là m’ont apissè èt tapè dins one câje sins prévenu. Èle m’ont rabotè l’ bètch. Dji n’è r’vin todi nin.
Lès deûs mwins m’ont tirè foû dol câje — dji pinséve èsse chapè — maîs one drole di bièsse avou on long cô s’a flanchè sur mi èt m’a fwarcè à drovu m’ bètch. Èle m’a vûdè one machûre à n’ s’ è nin fè one idéye dins l’ gôsî. Li c’mincemint di m’ creûs !
Deûs côps pâr djoû, li bièsse au long cô m’a fwarcè à avalè ci mwaîje machûre-là. Dji n’éve nin fwin portant. « Sondjez on pau, li min.me valichance qui 20 kg di spagètis à fè avalè d’ fwace tos lès djoûs à one djin » m’ a èsplikè on camarâde d’one ôte câje qui l’éve ètindu dîre d’on gamin qui passéve avaur-là.
À faît qu’on-z-avance, dji m’ sin todi d’ pus strindu, todi pus mau, ça n’ va nin.
Mi gôsî è-st-èfeuwè. I lî arive di son.nè.
Dj’aî one teribe varade. Mès camarâdes èt mi, on n’ saît s’ ritenu, c’è-st-on spitadje d’infêr su nos streûtès câjes.
Rèspirè normalemint m’èst divenu impossibe, dji stron.ne, dj’aî tchôd, télemint tchôd qui m’ faut tanflè tot l’ timps po saye di fè bachè m’ fîve. Gn-a one saqwè qui grochi dins m’ vinte qui d’vint pèsant, bin trop pèsant por mi. Impossibe di boudjè, co mwins’ di rotè.
Dj’aî d’djà pierdu dès camarâdes. Leû keûr a lachè s’apinse lès djins qui nos boûriatè. I gn-a onk qu’a rî d’ binaujetè en mostrant m’ vèjin. « Cit’-là, s’ féte sèrè ecstra ! »
C’èst qwè, ça, on féte ?
Parètrè qui Joselyne li saît bin. On conu s’ nom dins nos prîjons. Èle dit qu’ lès djins mougnè nos fétes qu’ont divenu dî côps pus gros. I sont malaudes, come nos-ôtes tortos.
Parèt qui ç’ comère-là èst conte li craû féte, maîs conte plin d’ôtes-z-afaîres èto qui dji n’ conu nin : lès rèstaurants chinwès, l’e-comèrce, lès pates di guèrnouyes, Amazon, lès rantwayes, lès r’pas tot faîts, lès aviyons, l’ôle di palmier, lès sapins d’ Noyè, li soja… Èle vike co come au viyadje, vèyoz. Maîs, tot comptè tot rabatu, n’èst-ce nin lèye qu’a raîson ?
Dj’aî one tièsse come one cawoûte.
Qu’èst-ç’ qui nos v’lèt à l’ fin, Poqwè do ?
Dji pleûre di mau èt di strindadje. Dji pleûre di disbautchance èt prîye l’ diu dès canârds di mète rademint fin à nos sofrances.
Çu qui vint après, dji n’è sé rin. L’rèstant èst por vos. Vos vièrez bin ç’ qui ‘nn’advêrè… ou nin