Ây, on-z-è cåze.
Asteûre, lès djins ont cåzi tortous ruçî leu trwâjime picadje èt … lu fâmeûs CST !
Sins ça, pont d' sôⁿrtadje… c' è-st-in « lêcher-aler » oudzeû d' tot l’ rèsse !
Ây mès les rouscayeûs n' è vlèt pont ! C' èst fwârt ! Bin ây : c' èst l' « libèrté », ku brâmint dès djins vlèt awèr. Èt lès-ôtes sîjèt come dès bèdot ki bêlèt. Èt èvoye al capitale po criyer leûs-ânrîes !
Dins tos lès payis, lu minêye è va. Lès djins sont mwins′ malådes èt lès ostos su voûdèt.
Lu CODECO nos rachûre èt rudroûve a pô près tot !
Il èst tins !
Asteûre, lès « psis » vont awèr du l’ ovradje, surtot amon lès djonnes. Èt on lès comprind : pont du scole, pont d' sôⁿrtîes, pont d’amûzmints, pont d’ ocupadje sociâl ! C' èst dèr du viker insi !
Lès djonnes, ça dèt boudjer èt vèy dès parèys a zês !
Lès spôⁿrts vont rfé boudjer la djonnesse èt moutèt lès ôⁿtes ossi. Nosse santé ènn′ è pris in côⁿp.
Fåt tot rmete su pî. On prind s’ coradje à deûs mwins èt an-n-avant !
On duvrè todi wârder nos bounes maniéres mès on n' duvrè pus poirter l' masse ! Ouf ! Bin, ça va fére do bin po tot l’ monde. On pôⁿrè rèspirer a s'n åje èt ou çk’ on vut !
Li vaccinadje continûrè po lès pus fråjûles : il åront drèt a in catrime picadje.
Nôⁿs minisses vont nos anoncè ène vîe pus bèle èt, an-n-atindant, boune djoûrnêye èt ku ça vous vache bin tot l’ resse du l’ ènêye.
Riyèz, tchantèz ! La vîe èst bèle ! Fåt-z-î crwâre !