Covite dijh-nouv s’ abate sol tiesse
Di bråmint des femes et co d’ omes.
Did la, i spåd ses ptitès biesses
Et rire di nos, mannet boulome !
I s’ muche e fén mitan des boles
Ki, foû d’ nos djaives, volnut dins l’ air
Cwand nos stiernixhans. Et les droles
Vos fwaiynut haper ene laide caire.
Ca nos bouyetes flotnut on tins,
Si stramant, di nolu veyowes.
Ele si winnnut åtoû des djins
Passant enocinnmint dins l’ rowe.
Ele si stitchnut å fond do nez,
Oudon s’ plaker dissu les mwins
Po, dins les peumons, ariver
Po nos stronner, å pus radmint.
Cwand vs oyoz haner vos peumons,
Trop tård po priyî ou djemi.
Vos dmeurroz resseré podbon,
E ratindant k’ ça fouxhe fini.
Ca i vout co rexhe di vosse boke,
Rispritchî et s’ rispåde dins l’ air,
Ci måssî virûsse la. Les clokes
Sounront ele vosse transe, et fé braire ?
I n’ avént pont d’ masses a nos dner.
Tén ? On ndè dveut-st awè a hope !
Mins les mwaisses si gretént leu nez ;
« On ndè trovrè ! Vén boere ene chope ! »
Pu gn a yeu des masses po tertos.
On s’ a don polou ricmaxhî.
E l’ Årdene, e l’ Espagne, partot,
On a stî passer ses condjîs.
Mins l’ catåre esteut-st a l’ awaite.
Il a rdåré dins les vijhnåves.
Co s’ diveur reclôre; ké pûne ! waite !
T’ savs bén k’ il esteut rispitåve !
Sicrît li 16 di may; les deus dierins hagnons, ki rahoucnut des etrevéns do moes d' djulete et awousse ont stî radjoutés pol Rantoele d' ivier (k' a rexhou e moes d' decimbe).