Deujhinme lete sint På ås djins d’ Corinte/I
Prumî tchaptrê
1. På, messaedjî da Djezus l’ Messeye, avou l’ åjhmince do Bon Diu, eyet l’ fré Timoté, a l’ Eglijhe do Bon Diu k’ est a Corinte, et å tos les crustins di tote l’ Acayeye.
2. Ki l’ gråce et l’ påye fouxhexhe so vozôtes tertos, del pårt do Bon Diu nosse pa, et do signeur Djezus l’ Messeye.
3. Ki l’ Diu l’ Pere soeye beni, et nosse mwaisse Djezus l’ Messeye, li pere do pardonmint, et l’ diu di tos les solåciaedjes…
4. …Ki sofrixh avou nozôtes tchaeke côp ki ns estans dins l’ penin, disk’ a tant k’ nos polanxhe ricfoirter les cis ki sont zels-minmes dins l’ penin, avou l’ minme foice di ricfoirtaedje ki l’ cene ki ns avans rçû på ricfoirt do Bon Diu.
5. Poy ki nos avans pårti totes les sofrixhances do Criss, adon, åd triviè do Criss, nos profitrans eto di s’ ricfoirtaedje.
6. Si nos avans des rascråwes, c’ est po k’ nos vos polanxhe riconssoler et schaper. Et si nos estans rconsolés, c’ est po vos rconsoler podbon, come vos l’ avoz bén sintou cwand vos edurîz sins rnigter les minmès sofrixhances ki nos.
7. Nos avans boune maye po vozôtes, paski dji savans bén ki, come vos avoz prindou pårt a nosse doleur, vos prindroz sifwaitmint pårt a nosse riconssolaedje.
8. Ca, binamés frés, nos n’ vos vlans nén catchî les rujhes ki ns avans cnoxhou e l’ Azeye. Nos î avans stî si mesbridjîs ki nos avans bén manké d’ î leyî les hozetes.
9. Po dire li veur, dj’ avéns les pinses d’ awè stî codånés a moirt. Mins c’ esteut po nos fé aveur fiyate, nén dins nos-minmes, mins divins l’ Bon Diu k’ est l’ vinkixheu del moirt.
10. I nos a schapé d’ on sfwait dandjî d’ moirt, et s’ nos schaprè-t i co. C’ est sor lu ki dj’ avans metou l’ espwer k’ i nos rschapaxhe co todi des ôtes côps.
11. Vos nos dvoz ossu aidî pa vos priyires, po k’ toplin des djins rmerciyexhe li Bon Diu pol benediccion ki nos atoumrè a cåze del priyire di cisse minme flouxhe di djins la.
12. Paski, çou ki fwait nosse firté, c’ est l’ temognaedje di nosse consyince ki nos nos avans cdût avå les djins – et aprume emey vozôtes - sins grandiveusté ni toursiveusté, et sins shuve les tuzaedjes do monde, mins fok avou l’ åjhmince do Bon Diu.
13. Paski nos n’ vos scrijhans rén d’ ôte ki çou k’ vos lijhoz et l’ comprinde, et dj’ espere ki vos comprindroz totafwaitmint….
14. — come vos l’ avoz ddja comprins assez bén — ki, å djoû do rivnaedje da nosse Signeur Djezus, vos seroz firs di nozôtes ostant k’ nos serans contins d’ vozôtes.
15. C’ est paski dj’ esteu seur di çoula ki dj’ a volou vni on prumî côp dé vozôtes, pu on deujhinme côp, po vozôtes awè ene deujhinme apriyesse del gråce.
16. Dji vos vleu co raler vey so m’ voye eviè l’ Macedwene, et co rpasser dé vozôtes cwand dji rvénreu did ladrî, et k’ vos m’ årîz adon racpagnté por mi rwangnî l’ Djudêye.
17. Esteut ç’ des plans fwaits al grosse fotche ? Oudon-bén, do planetaedje sins tuzer, et m’ ôre dire e minme tins « taiss k’ åy » et « oyi mins nonna » ?
18. Ossu seur ki l’ Bon Diu est fiyåve, dji n’ vos dirè nén sol minme trevén « oyi » et « nonna ».
19. Paski pol Fi do Diu, Djezus-Cris, ki nos vos avans acsegnî, mi, Silvin et Timoté, ci n’ esteut nén « oyi mins nonna », mins avou lu, c’ est tofer « oyi, oyi ».
20. Pask’ il a todi dit « oyi » ås dmandes do Bon Diu. C’ est po ça ki c’ est par lu ki nos djhans « åmen » a Diu, eyet l’ glorifyî.
21. Et c’ est l’ Bon Diu ki nos aloye, vozôtes et nozôtes, dins l’ Criss; et c’ est lu ki nos a ondou del sinte ôle…
22. …et ki nos a eto marké di s’ catchet, et k’ a fwait adschinde li Sint Spér dins nos cour, a môde di dnî-diu.
23. Mins — dji prind l’ Bon Diu come temoen a tchedje — c’ esteut po vos spårgnî des måleurs ki dji m’ a rastinou di rivni a Corinte.
24. Nén ki nos åyénxhe doté d’ vosse fwè, mins nos avans ovré po k’ vos soeyîxhe a voste åjhe, et seurs et certins dins vos creyances.