Deujhinme lete sint På ås djins d’ Corinte/X
Dijhinme tchaptrê
1. C’ est mi, På, ki vos l’ dimande a djno, po l’ amour di Djezus-Cri — mi ki s’ fwait tot ptit cwand dji so coirzenoxh divant vozôtes, mins ki dvént bråmint pus hardi cwand dji so lon erî —
2. Dji vs è preye: cwand dji serè rarivé emey vozôtes, ni m’ oblidjî a-z awè li straegnté ki dji va eployî totasteure disconte sacwants ki deynut ki nos volans djusse wangnî des çanses.
3. Paski, si nos nos siervans des cwårs, nos n’ nos batans nén po ramonçler les liårds.
4. Paski li nier di nosse guere, ci n’ est nén les sôs, mins li foice do Bon Diu ki pout spîter totes les murayes disfindreces.
5. Dji flaxhans djus les råjhons et les fås råjhonmints ki vont esconte del kinoxhance do Bon Diu; si atournans dj’ les djins k’ ont des idêyes totes fwaites a schoûter Djezus-Cri;
6. si estans dju presses a pûni tos les cis ki rtoûnrént cazake, on côp k’ il ont decidé a nos schoûter.
7. Loukîz çou k’ i n a dvant vos ouys. Si ene sakî vout esse on abshuveu da Djezus-Cri, k’ i s’ mete e l’ tiesse ki, come i shût Djezus-Cri, nozôtes, avou, dji shuvans Djezus-Cri.
8. Et cabén ki dji m’ vantreu ene miete ditrop di l’ otorité ki l’ Signeur m’ a dné, ‒ po vos scoler comifåt, et nén po vos dzôrner ‒, dji n’ è sereu nén djinné.
9. Dji n’ vou nén awè l’ air di vos fé sogne avou mes letes.
10. Pask’ i gn a des cis ki djhèt : « Ses letes sont bén tournêyes, avou des belès foitès avizances, mins cwand il est la coirzenoxh, i shonne mo flåwe et fwebe, et ses pretchaedjes, c’ est tos boignes messaedjes.
11. Fijhoz comprinde a ces djins la ki, çou k’ nos djhans dins nos letes, cwand nos n’ estans nén la, nos l’ fijhans cwand nos estans la.
12. Ci n’ est nén paski nos nos rmetréns a onk di ces-la ki s’ ricmandnut zels-minmes. Mins cwand t’ elzès voes ki s’ muzurnut d’ onk a l’ ôte, et si rmete onk a l’ ôte, i m’ frént bén rire di leu loignreye.
13. Tant k’ a nozôtes, dji n’ nos vlans nén vanter foû mzeure ; nost aroyaedje, c’ est l’ triyaedje ki l’ Bon Diu nos a metou po pretchî l’ Boune novele, et ci stindêye la nos amoennrè disca vozôtes.
14. Taiss ki nos n’ nos forsitindans nén, et passer foû d’ nos limotches, come si nos n’ åréns nén yeu l’ åjhmince d’ ariver disca dé vozôtes. Nén rovyî ki ça a stî nozôtes, les prumîs k’ ont-st avnou addé vozôtes avou l’ Boune Novele da Djezus-Cri.
15. Nos n’ nos vantans nén pår di l’ ovraedje dås ôtes. Mins nos sperans ki, a fwait k’ vosse kiminålté s’ racrexhrè, nos pôrans ndaler pus lon padvant dins vosse payis…
16. …et-z î pretchî l’ Boune Novele; dj’ ô bén: sins passer houte des limotches ki nos ont stî metowes, et sins s’ vanter d’ l’ ovraedje ki des ôtes pretcheus on fwait lavola.
17. « Ki l’ ci ki s’ vante si vante å no do Bon Diu ! »
18. Paski ci n’ est nén l’ ci ki s’ vént prezinter lu-minme k’ a l’ abondroet d’ pretchî, c’ est l’ ci k’ c’ est l’ Bon Diu ki ricmande.