Deujhinme lete sint På ås djins d’ Corinte/XIII
Trazinme tchaptrê
1. C’ est l’ troejhinme côp ki dj’ vén dilé vozôtes. Tot çou ki vs åroz dispinsé por mi doet esse acertiné pa deus u troes temoens.
2. Dji prevén les cis k’ ont fwait des petchîs et tos les ôtes, dji les prevén asteure ki dji n’ so nén la, come dji l’ aveu ddja fwait cwand dj’ esteu la, a m’ deujhinme vizite, dj’ elzès prevén ki, si dji rvén co on côp, dji n’ les spågnrè nén (et lzî dire leus toirts divant tertos),…
3. poy ki vos cachîz après des prouves come cwè c’ est l’ Criss lu-minme ki cåze avou m’ vwès. I n’ est nén flåwe cwand il a-st a fé a vozôtes; c’ est l’ contråve: il est foirt cwand il est emey vozôtes…
4. pusk’ il a stî crucifyî come ene djin sins foice, mins il a raviké pal foice do Bon Diu. Paski, nozôtes eto, dj’ estans fwebe divant lu, mins tot s’ ocupant d’ vozôtes, nos vicrans avou lu, pal pouxhance do Bon Diu.
5. Waitîz vozôtes-minmes, po vey si vos shuvoz l’ vraiye fwè. Fijhoz des sayes so vos-minmes. Oudon, ni creyoz vs don nén, å sudjet d’ vozôtes-minmes, ki Djezus Cri vike ådvins d’ vozôtes? — oyi, vos nel creyoz nén, si vos n’ avoz nén reyussi les esprouves.
6. Dji spere ki vos vieroz bén ki, nozôtes, dji n’ avans nén raté les esprouves.
7. Mins nos dmandans å Bon Diu po k’ vos n’ soeyîxhe nén dins l’ petchî — nén ki nos nos volans vanter d’ aveur passé les bardouxhes, mins po k’ vos vos houwîxhe do petchî, et ki nozôtes, adon, nos nos divréns rpinti di vos awè må djudjî.
8. Paski nos n’ polans rén fé disconte li verité, nos n’ polans ovrer ki po l’ verité.
9. Ca nos seréns fén binåjhes di vey ki nos avans stî flåwes dins nosse djudjmint, et k’ vozôtes, vos estîz dins l’ bon. Nos priyans di tot nosse cour po k’ vos rivnîxhe sol droete voye.
10. C’ est po çoula ki dj’ a scrît tot çouci dabôrd ki dj’ so lon erî d’ vozôtes, po ki, cwand dj’ arivrè, dji n’ divaxhe nén esse trop sitraegne dins l’ uzaedje di l’ otorité ki l’ Signeur m’ a dné, po basti, et nén po distrure.
11. Al fén des féns, mes binamés frés, ragaiyixhoz vos. Sayîz di vos ricfoirter et d’ vos solåcyî d’ onk a l’ ôte, d’ esse todi d’ acoird onk avou l’ ôte, eyet viker e l’ påye; adon, li Diu d’ amour et d’ påye serè avou vozôtes.
12. Salouwez vs onk l’ ôte d’ on rabressaedje rilidjeus.
13. Tos les dicipes (ki sont-st avou mi) vos preynut leu bondjoû.
14. Ki l’ gråce do Signeur Djezus-Cri, l’ amour do Bon Diu et l’ camaerådreye do Sint Spér soeyexhe avou vozôtes tertos.