Diyaloke inte Djihan-ki-ploye et Linete Makêye

Ciste ouve ci egzistêye eto divins ds ôtès ortografeyes : Feller-Piron.

o.n.c.

rortografiaedje da Lucyin Mahin

18inme sieke (mwaisse) / 2024 (riscrijhaedje)

Diyaloke inte Djihan-ki-ploye et Linete Makêye

- Diewåde feye, diewåde brantchete,
Vs estez todi m’ diyamant !
Ni tchante nén co l’ ålouwete
cwand vs estez avå les tchamps.
Por vos, dj’ a todi l' hikete,
Dji n’ pou pus magnî dè pan
Si dji n’ vis a po m’ poyete,
Si dji n’ so voste ortolan.

- C' est la totès colibetes
Ki vos m’ contez, loyåd Djhan
Dji so eco trop djonnete
Po-z etertini m' galant.
Mins dj’ a ene sacwè ki m’ tourmete,
Dji croe k’ c’ est on diåle volant
Ki fwait ki dj’ so-st inkiyete,
Ki m’ fwait awè l'trosse-galant !

— C’ est l’ amor k' est a l’ awiyete :
I fåt k’ il åye bén dalant !
C’ est ossu lu ki vs dispiete
Cwek’ i fjhaxhe li fås doirmant.
S’ i vout intrer pa vosse poite,
I n’ a k’ fé d’ on passe-avant :
Cwand ‘l a s’ bounet ås xhiletes
I fwait pés k’ on ptit volant.

- Vos avoz l' linwe ki vs caktêye,
K’ est tot come ene pire d’ inmant
Dj’ ô bén a vos tchansonetes
Li vs avoz lî l’ Alcoran.
Vos vôrîz bén di m’ pansete
Po magnî avou vosse pan.
Dji so come po braire « schovlete ! »
Dji n’ m’ egadje nén pus avant.

- Po ci côp la, dji m’ va piede,
Ou prindoz m’ po vost amant !
Schoûtez m’ don, mi ptite moulete,
Dji so fidele et constant :
Si dj’ sereu vosse lamponete,
Vos serîz m’ muroe ardant.
Nos djouwréns al respounete,
C’ est on djeu k’ est si tchårmant !

- Dji voe bén k’ i fåt k’ i pete :
Vos estoz trop complaijhant !
Mais si vs estoz ene trompete,
Dji serè tabeur batant !
Et po ricnoxhe nosse houbete,
Nos î metrans on crexhant.
Dji serè todi Linete
Et vos serez todi Djhan !