Dizos l′ovreû d’on tèyeû d’ pires — in-abatou,
on teûtê d’ panes monté so pîces —,
sins l′ome qu’oûveûre là, vos-årîz ‘ne gote pawou
come d’èsse tot fî seû d’vins ‘ne èglîse.
Mins l’ovrî bouhe; on ôt toketer s’ hèrpê.
Åtoû d’ lu, lès creûs d’ pîre si drèssèt hår èt hote
come ine porcèssion qui s’ disfêt.
Sûremint qui l′ tèyeû d’ pîres a dès-ôtès-îdêyes,
dji l′ô qui gruzinêye
tot sûvant l′êr avou sès côps d’ mahote :
on côp chal, on côp là, come s’i d’néve ine rawète…
Tot suvant ‘ne êr di danse qui l′aveut fêt danser,
l′ome markée lès treûs lètes :
R.I.P.
Mins l′ tèyeû d’ pîres a dispindou s’ frake èt s’ canote
qu’ine creûs t’néve à reûd brès’ podri lu.
Èt volà l′ome rèvôye. On n’ l′ôrè pus.
Asteûre qu’i fêt bin påhûle è l′ovreû,
on n’ sint portant nole disseûlance inte di lès creûs.
On dîreût qu’ cès pîres-là covrèt dèdjà ‘ne saquî,
ine åme ou ′ôte… Såreût-on dîre ?
Tinez, si dji m’ hoûtéve, dji f’reû ‘ne priyîre…
Awè… mins po quî ?
divins « Poèmes de Jules Claskin », eplaidîs pa Maurice Piron, La Vie wallonne, t. 16, 1936, p. 50.