Tortos conuche lu floriconte du Sint Yubert èt co ku c’è-st-one waerantîye po l’ radje èt lès dints.
Dins lès r’layadjes du l’istwère, on côse todi du Plectrude, dès abés, du Yubert, du Don Spirlèt èt dès aradjîs,
Mès l’istwère do Bourg è conuchi dès ontes floriconte, dont on nu côse wêre !
A vla onk.
Dins totes lès èglîjes èt lès abîyes, i gn avéve one pitite plèce po sognè lès djins k’on djét avou l’ djâle dins l’ cwar. On djét çoula avou râjhon ou nin, mès pa dè conps, lès djins astint dits « macreas » jusse pa djalouzîye ou pa lès malignants.
Padzo lès abés Balla èt De Masbourg, Djan d’ Roumont astét on tchèsseû d’ djâles.
Il astét fwart inmé parèt-i èt s’ succès vènét du sès priyîres, du sès djoûs sins mougnè èt du s’ fwè.
Djan n’avét pus k’on brès (lu drwèt) po fé sès cayèts pasku l’ gåtche astét paralizè.
Comint li, grand sierveû do Bon Dju, avét plu aveûr one paralizîye ?
On nos dit k’il è oyu çoula an 1606, après aveûr tchèssè lès djâles Léviathan èt Belzébuthe èt Astaroth, padfû l’ cwar d’one djonne fèye d’one vintin.ne d’anêyes.
On dit co k’il è boutè treûs mwès å lon po-z î arivè.
On nos dit co todi ku, mwaîs, lès treûs djâles l’ant atrapè, èt l’ant misdrouyè, lu lêchant là po mwart.
Lu Bon Dju l’è såvè, mès dins l’istwère, il è pierdu su brès gåtche.
Il è kan minme moru an 1619 à Sancy (Udange).
Mès vola ! Èst-ç’ vrè çu k’on dit ? Ba ! on dit ku c’èst vrè !
Riscrît a pårti d’ ene prumire modêye nén rcoridjeye metowe so les Berdelaedjes.