Å cmince, gn ava on lijheu del Rantoele, on grand uzeu des tchmins d’ fier, ki leya aspiter l’ idêye d’ ene peticion al Sofeye Dostoirdoe [Sophie Detordoir], po l’ walon moussî ezès biyets d’ trén. Ene pîlance [demande insistante, pétition] sicrîte e francès ey e walon.
Mins, s’ i gn åreut k’ deus pelés et troes tondous ki peticionrént, ça freut rire di l’ idêye. Ni våreut i nén mî ene lete-lete (lete so papî, nén èn emile), sinêye pa deus troes djins k’ årént l’ apinse di bouter al tcherete po on sfwait pordjet ? Eyet ndè poleur fé l’ shuvance [suivi].
Nosse Sofeye k’ on-z a dit, c’ est l’ directoresse des Tchmins d’ Fier del Beldjike. Eyet ‒ c’ est kécfeye ene tchance ‒ elle a-st ene licince di romanes. Ça fwait k’ ele divreut comprinde mî k’ èn ôte di cwè k’ i rtoûne.
Po l’ djoû d’ ouy, on pout acater on tiket d’ trén nén seulmint ezès troes lingaedjes oficirs, mins co e-n inglès. Dj’ ô bén : so l’ tiket, totafwait pout esse sicrît pår e-n inglès, åré les nos des ståcions. Po les anonces dins les hôt-pårleus des gåres, c’ est parey : les aconcoisteu·se·s di trén ont dins leus sûtifones totes les anonces e-n inglès eto. Et gn a sacwants dins leus dzeutrins [supérieurs] ki les ecoraedjnut di fé les anonces e-n inglès eto.
Portant, l’ inglès n’ a nole plaece e Beldjike po çou k’ est del lwè.
On pout etinde ki c’ est pa amiståvisté po les tourisses inglès-cåzants, soeye-t i des Inglès u des Amerikins, soeye-t i des etrindjirs k’ ont-st aprins l’ inglès po voyaedjî tocosté.
Dins l’ lete, on pôreut rmete sacwants idêyes soûmintreces [fondamentales] ki n’ sont nén co tant cnoxhowes pa Tibî Meyî [tout un chacun]. Come :
- Li walon n’ est nén on diyaleke do francès. C’ est on roman lingaedje come les ôtes. Metans : li catalan, li roumantche di Swisse, li monakin, li ladin, li galicyin, li portuguès, et hay vos nd åroz. Insidon, li walon, c’ est on près-parint do francès, come l’ inglès, c’ est on près-parint do flamind.
- Li walon est rconoxhou come lingaedje divintrin del Kiminålté Walonreye-Brussele på Decret Valmy Féaux di 1983.
- Li walon a rçû on côde ISO [International Standardisation Organisation], ki c’ est « wa », del pårt del bibioteke do congrès des Estats Unis. Li decidaedje, ki date di 2002, a shuvou on dossî apresté pa Pablo Sarachaga, avou l’ aidance da Lorint Hendschel et Stefane Kertinmont, et des soces « Li Rantoele » et « Union Culturele Walone ». Vos ploz vey ene videyo ki Pablo raconte tote cisse paskeye la sol tévé waloncåzante.
- li walon, c’ est li SEU lingaedje k’ a skepyî e l’ Walonreye – et gn årè dandjreus nol ôte sifwait après lu. Li stindêye la k’ il esteut pårlé pa tertos disk’ å cmince do 20inme sieke, ça rprezinte 75 åcint del Walonreye politike. S’ on dvize eto des ôtes lingaedjes divintrins e l’ Walonreye (picård, lorin, tchampnwès, lussimbordjwès, leus birces [berceau] di nexhance, c’ est dins èn ôte payis, li France po les troes prumîs, li Grande Dutcheye pol dierin. C’ est ces payis la k’ ont so leu spale di schaper et diswalper ces lingaedjes la, nén l’ Beldjike ni l’ Walonreye. Mins l’ walon, siya !
Po çoula, nos vos atåvelréns :
- di radjouter l’ walon so les tikets, po les djins ki vôrént awè on tiket e walon. Fåreut awè ces programes la so les machenes a fé des tikets, sol waibe-botike do Tchmin d’ Fier eyet so les éndjoles des bawetîs [bawetîs]. Po spårgnî les cwårs del « Societé Nåcionåle », les sineus del lete dirént k’ i sårént fé po rén, å cmince, todi, les ratournaedjes k’ i fåt.
- di radjouter, so les sûtifones et les tåvletes ITRIS des aconcoisteu·se·s di trén (k’ on loméve davance « controleus », et co pus timpe les « pikeus »), ene modêye e walon eto, po tchaeke anonce k’ i gn a. Çoula, po k’ les chef·e·s di trén et leus aidant·e·s polnuxhe fé les anonces e walon, avou. Et radjouter precåcioneuzmint « come di djusse, si ça lzî ahåyreut [à leur convenance], après les cenes e francès, eyet purade dins l’ pus grosse pårt del Walonreye, la ki l’ walon esteut djåzé classicmint. ».
- di radjouter les minmes so les éndjoles des spikeu·se·s, po ces djins la poleur fé les anonces e walon ossu, dins les condicions come dit cial ådzeu.
Si vos årîz d’ l’ agrè di radjonde les bouteus po ciste idêye vola, sicrijhoz a slianarchissep
atutanotam.com.
Sacwants waloneus, do 9 å 12 di decimbe 2021.