I m’ shonne ki dj’ etind des pas dsu l’ pavé.
Piane piane ! piane piane !
Ça soune dins l’ djalêye.
On etind des pas djemi dsu l’ pavé.
Piane piane ! piane piane !
Ki l’ veye est fayêye !
C’ est putete les pas d’ ene pôve viye grand-mere !
Piane piane ! piane piane !
Come i sont reyusses !
Daler ls assister ? Mins, sait on djamåy…
Piane piane ! piane piane !
Dsu ké tchmin å djusse ?
I gn a tant d’ pavés
Ki vnèt et ki vont !
Ki tindèt leus mwins
E tos les viyaedjes !
Cwand vos arivroz,
Ça srè co si lon
K’ vos åroz dins m’ mwin
Rade pierdou coraedje !
I m’ shonne ki dj’ etind des pas dsu l’ pavé.
Piane piane ! piane piane !
Ça soune dins l’ djalêye.
On etind des pas djemi dsu l’ pavé.
Piane piane ! piane piane !
Ki l’ veye est fayêye !
I gn a pourtant nén tant des pavés k’ ça !
Piane piane ! piane piane !
I gn a k’ del droete voye.
Vos n’ vos piedroz nén, vos rtrouvroz les pas.
Vosse consyince aschoûte.
Mins dispaitchîz vos !
C’ est putete trop tård.
Coroz pa l’ pî-sinte
Po rascourti l’ voye !
Mins dispaitchîz vos !
C’ est putete trop tård.
On mourt sins k’ on l’ sinte.
El veye est rade voye.[1]
Å dbout do pavé, l’ cloke soune a trepas.
— Piane piane ! piane piane ! -
Pattavå l’ djalêye.
D’ å dbout do pavé, rtournez dsu vos pas !
Piane piane ! piane piane !
Ki l’ veye est fayêye !
El consyince
Ciste ouve ci egzistêye eto divins ds ôtès ortografeyes : Feller-Mouchon d'Aunia — Èl consyince (Feller-Piron).El consyince
rortografiaedje da Lucien Mahin
El consyince
- ↑ Po « evoye », leyî insi po wårder l' pîtaedje.