El meyeu fime sereut walon (Li Rantoele)

Ciste ouve ci egzistêye eto divins ds ôtès ortografeyes : Mwaisse sicrijhaedje.
El meyeu fime sereut walon
Li Rantoele,  96,
El meyeu fime sereut walon

Li Walonreye n’ est nén foirt kinoxhowe po ses fimes, contråvmint al France u co ås Estats-Unis.

Li nombe d’ acteurs eyet d’ actoresses, nos l’ plans conter avou nos doets sins rujhes. Li nombe d’ ouves pareymint.

Å resse, gn a-t i onk di vozôtes ki m’ såreut citer èn ovraedje då setinme årt walon ? Fåt nén dmander si dji vos di : on fime walon-cåzant.

C’ est cwè les cåzes ?

Po cmincî, c’ est dins nos tiesses : i n’ nos shonne nén possibe k’ el meyeu fime daegnrece pôreut esse walon. Portant, ci sereut bén l’ cas.

Ça s’ a passé dlé mon vozôtes

Vos sovnoz do fime : « Ça s’ a passé dlé mon vozôtes » ? Li tite e francès : « C’est arrivé près de chez vous ».

C’ est on fime e noer et blanc, tourné e 1992. I s’ adjit d’ on fås rapoirtaedje wice k’ ene ekipe tecnike shût Benoît Poelvoorde, ki djowe li role d’ on moudreu sins fwè ni lwè.

Mins, ki vos m’ alez tertos dmander, pocwè ki ç’ fime la sereut-st on caliguluk ? Cobén k’ i gn a sacwantès djins ki pinsnut ki l’ istwere est trop simpe, ene miete biesse. (C’ est leu droet d’ pinser insi. Tchaeconk si gosse, dit-st ele li troye ki rmagnive si stron.)

El lisse des criticaedjes pôreut esse longue, mins, por mi, c’ est pår on grand fime, pask’ il a ene djivêye di beas costés eto.

Po cmincî, li fime a stî prodût po on boutaedje di fén d’ estudes, C’ esteut don li prumire saye des filmeus. Ça fwait : èn soeyans nén rujhûle dins nosse corwaitaedje. El prumî côp, gn a rén k’ est djamåy åjhey.

Benoît Poelvoorde, asteure, on l’ riwaite come on grand acteur. Mins å cminçmint des anêyes 1990, gn aveut nolu ki l’ conoxheut.

Les ôtes persounaedjes estént djouwés på l’ ekipe tecnike udon bén, pa des djins come vos et mi. Cråne idêye ! Come i n’ avént nén on nouzome buddjet, i dvént trover des pititès emantcheures po muchî l’ mancance d’ moyéns. Ces acteurs « civils » la èn savént nén k’ il estént dins on fime. I creyént bén esse dins on rapoirtaedje. Ça fwait k’ i gn aveut nou risse di sordjouwaedje.

Manaedjî les accints

Nén dandjî d’ awè ene fråze come : « ç’ a stî tourné e Nameur ». On l’ sait ddja bén tot-z aschoûtant les accints, aprume li ci da Benoît k’ est pus prononcî roci ki dans ses ôtes djouwaedjes.

L’ uzaedje des accints radjoute ene miete di reyalisse. Mins li produjheu ni tchait nén dins l’ burlesse oubén dins l’ mocreye, come c’ est sovint l’ cas dins les pîces di teyåte e francès la k’ gn a des persounaedjes walons avou des accints do payis.

Noere rizêye

Tot l’ fime est basti so del « noere rizêye ».

C’ est ene cwåte foirt målåjheye a djouwer. Fåt acoirder ene comedeye avou on sinnario d’ ripoirtaedje.

Prindans li sinne do woeyeu d’ nute afrikin. Benoet-l’-moudreu est maçon so on grand tchantî. I djowe a rimpli on cofraedje al palete avou do moirtî. I vént d’ dischinde li noer woeyeu d’ nute. Et dire ås rwaitants (do fime): « c’ est honteus ! Dire k’ i gn a des eterprijhes ki pudnut des djonnes Afrikins po fé awaiteu d’ nute, paski sorlon l’ dåron (patron), ces bouteus rola n’ serént nén veyåve dins l’ noer. »

Pu adon : « Pocwè k’ i lyi dinnut ene djaene cazake, dabôrd, s’ i volnut k’ i soeye invizibe ? ».

Adon, li wadjeure del « libe parole » et nén do « politicmint comifåt » est ene miete riscante, dins l’ sinse k’ on pôreut croere ki c’ est do raecisse. Mins on voet bén k’ c’ est del rirêye. Ça fwait k’ i fåt ratuzer ki c’ est les ôtès paroles del sinne ki sont l’ mwaisse messaedje :« waite on pô ! i vont cweri des djonnes di 18 ans ås payis do solea » (et les mete a des laids ovraedjes roci).

Foirt å foirt

Çou k’ est l’ pus ewaerant (a bon), c’ est k’ des djins ki n’ ont waire li liårds polnut esse ossu foirts ki les gros produjheus.

Ces-ci ni oizrént nén awè on mwaisse persounaedje ki cåze toltins ås rwaitants, tantea k’ c’ est come s’ on-zåreut passé ene shijhe avou des camaerådes.

Samuël Dumont, rascourti
rarindjî d’ on papî eplaidî sol
waibe « Belletristica »,
li 26 d’ awousse 2020.