Dji vos cåze did la septante cénk ans. Dj' aveu 7 ans, puski dj' end a cwatrè-vint deus.
Nos endaléns l' semdi avou l' tram al wapeur pa Amsin. Nos arivéns al vesprêye dilé l' vî mononke Åbwin. Il esteut bén metou sol plaece do viyaedje. Il aveut dvant s' måjhone tote li ribambele di rôlotes pol fiesse do londmwin.
Li tchvå d' bwès esteut al bele plaece, divant ses finiesses.
Li Toenne, tot l' monde el conoxheut dins l' cotoû, pask' i gn aveut k' lu, a ç' moumint la, k' aveut on tchvå d' bwès. I meteut lodjî si tchvå dilé mononke. C' esteut ç' biesse la ki fjheut tourner li tchvå d' bwès. Tot l' tins del fiesse, il esteut elaxhî a ene tchinne. Et po demarer, Toenne li zwebéve avou on côp di scoreye po-z estchessî l' tourniket. Ci-ci esteut ekipé avou des tchvås d' bwès di totes les coleurs : des blancs, des pemlés, evnd.
So les tchvås, gn aveut des bêces k' on s' pleut ashir a cwate didins. I n aveut ossu des pots, k' on s' meteut a cwate didins ossu, k' on fjheut tourner tant k' on n' voeyeut pus clair.
Après cénk shijh munutes, tot esteut bén lancî, avou ene viole ki Mareye, li feme da Toenne, fijheut tourner al manike. Adon, li clotche aléve, et Toenne saetchive so ene plantche k' esteut elaxheye padrî li tchvå, po-z arester l' caroussel. Et Mareye ramasséve les cwårs dins ene boûsse di toele.
I gn aveut des tirs ås pupes. C' est l' ci ki casséve li ni k' aveut ene cocåde. Des botreces avou des såçussons d' Bastogne et des boleas. C' esteut des bokets tot toirdous avou del låme. Gn aveut eto des caramels et des orayes di papî avou ene pitite biestreye.
Ene miete pus lon, i gn aveut des balançweres. On les estchessive å pus hôt. End a minme des cis ki les rtournént.
Li londi, on fjheut les djeus; on elaxhive ene åwe pås pates, li tiesse e bas, et i lyi faleut côper l' tiesse avou on baston avou les ouys bindlés. Li ci k' î arivéve aveut l' åwe por lu. I gn aveut des djeus d' boles dins les cåbarets. I gn aveut ossu des coûsses di velo dins l' viyaedje po tos les cis ki vlént sayî; les coûsses didins les saetchs et les coûsses di rinnes. On s' meteut al lene avou ene rinne dins ene berwete, po-z ariver céncwante metes pus lon. Mins les biesses sôtlént foû tot l' tins. Elzès faleut rmete tofer el berwete po-z ariver avou al lene d' arivêye. Li prumî, c' esteut l' pus malén ki seréve li biesse cwand ele sôtléve foû del berwete, po k' ele ni bodjaxhe pus.
Li fiesse si passéve insi po nozôtes, paski nos aléns doirmi nåjhis come des pôves.
Al nute, nos parints alént danser dins les cåbarets å son des årmonicas et boere ene pinte po on gros sô (10 cintemes).
Nos sondjéns co lontins al fiesse e s' rafiyant di esse l' anêye d' après po rcomincî.
Li londmwin, nos rlavéns nos ptits shabots, po raler e scole e cåzant del fiesse tertos eshonne.
Mins po les djins did la, gn aveut co l' londi. On cmincive après l' messe des trepassés. Gn aveut on tchår wårni avou des coxhes, tcherdjî d' muzicyins ki shoflént a si sketer les mashales, ki fjheut l' toû do viyaedje. Il alént djouwer sol plaece pol prumire danse et l' distribucion des cocådes. Come paymint, on dnéve çou k' on vleut et tot l' monde esteut contin.
Note Wikisourd
Eplaidî aprume so l' Aberteke (e 2006); ene miete ricoridjî vaici.