Estant on fi di cincî, mochî a s'manîre an alant mète èt lèyi dès tchèteurs o bwès â kmins'min do prétimps èt an alant lès rikèri o mwès di djulèt o d' awousse, avou li lâme o l'réve didins, Dj'èsteus dèdja fwart intèrèsé a prume qui dji nos fizins glèter li mèton dès samin.nes â long avou lès clapants wastês di lâme qui mi poupa n' è sècheût foû.
Di s'timps-la, dj'a co vèyou dins lès an.nées 40-50, o m' viadje, sipotchi do l' lâme o l'réve po dn'è sètchi foû li lâme come on fét avou on frutadje po dn'è tirer li dju. I fizint divant mori lès moches an lès-èfoumant avou do soufe, çou qui dj'a vèyou ossu ad'dé ci mochî-la. Portant, gn'i aveut dja dès "ruches" come asteûr èt one manîre d'ovrer come asteûr mès i n' kinochint nin co çoula o m'viadje.
Dispû mi èfance, dj'a todi avou l'misse di sèy mochi cwand dji l'poureus èt çoula n'a stou posibe qui cwand dj'a avou on grand djârdin èt min.me one pature podrî douski dj'a plou bâti mi api a coron dès an.nées sèptante. Dj'a stou kèri mès prumîres "ruches" ad'dé on tchèsturlin do costé d'Ath qui s'èst difzeut , dèdja a câze do l'piète di brâmint d' an.nées dvant èt dès nich'tés qui lès cinsîs sipârdint so leûs tchamps èt qui fizint crèver sès moches. Dji n'm' a nin discoradji ni disgosté po ostant. Dj'aveus dès âbes a frutatches qui n' pwartint kahi rin dvant èt qui m'è n'ont dné one hoplé lès an.nées suhantes.Dj'aveus ossu li plèzîr di pleur ritrover li clapante lâme o l'réve di mi èfance èt surtout di pleûr viker avou z'èles èt di lès sogni tot-â long do l'sahon.Adon, dji f'zeus pârtie dès mochîs di Brusèl qu'èstint fwart come i fât èt so qui dji pleus m'aspoyi èt m'fé consiyi. Mi api èsteût ad'dé Brusèl, a Zellik . Dispû mi pansion, dj'a aminé dès tchèteûrs ossu o zès-Ardènesa Mont-Oufalîje èt dj'a ovré adon avou lès mochîs do Luksamboûrg, an wârdant co todi mi api di Zellik.
K'â coron dès an.nées octante, tot aleût bin èt dji n'èsteus bin binaje. Adon, vina li "varroa", one pitite aragne d'Asie, grande distruyeuse di nos moches a lâmes qui n' i l' kinuchint dvant èt qui n'savint nin si disfinde. Il a falou trover dès rmédes, po z'ataker, l'apistan èt pwis l'apivar èt asteûr li thymol a l' zî mète a l sinrmé , an l' lèyant è plèce al mwinse 2 mwès k'a tant qui li pus' posibe di varroas crèvinche èt touminche so l' panè èt li foye qui li mochî a mètou o fond èt douski i pout vèy çou qui èn n'èst: pôke ou brâmint di varroas èt savèr çou qui deurèt co fé pus târd si fât.
A kiminc'mint dès an-nées 2000, dj'a avou pus' di piète èt a prume kwand li gôcho/régent da Monsanto èt Bayer ont ataké so lès tchamps di maïs a Zellik nin long di mi api, dji lès-â pièrdou chake an-née a l'fin di djulèt èt â k'minc'mint d' awousse cwand i florichint. Lès tchèteûrs èstint vudi di leûs moches!
Asteûr ki n'è sèmèt pus dispû 2 ans, dji lès wâde èt èles si pwartèt bin. O l'plèce d'èn nè raminé dès Ardènes come lès mâlès-an-nées d'vant, cis- t'an.née, dji deûs èn-nè raminer o zès-Ardènes douski dj'a kahi pièrdou tot sâf' one,l'an passé. Si dji n' vèyeus nin fwart voltî mès moches èt tot çou qu'èles fizèt, dji pinse qui come brâmint dès-ôtes mochîs asteûr, dji n' porsûreus nin. Dj' î tins trop' po lès-aband'ner èt dj'èn n'è sèreus adon trop' maloûreus. Dj'a co todi li misse d'aler lès r' trover èt d'ovrer avou zèles li pus sovint posibe.
Fizans tortos esone tot çou ki fat po les warder. dj'en -avans absolumint dandji!
L' accint rindou dins ç' tecse cial et l' ci d' Oufalijhe.