Evandjîle sorlon Marc/XI
XI.
L’intrèye a Jèruzalèm.
1. Qwand is sont cåzî a Jèruzalèm,
vè Bètfayé èt Bètanêye,
ad’lé l’mont dès olivîs,
2. il èvôye deûs d’sès discipes èn-avant
tot ’lzî d’hant :
« alez-è disqu’å vièdje
dreût d’vant vos.
Djusse tot-z-î moussant
vos toum’rez so on p’tit ågne
qu’è-st-al cwède,
èt so lisqué
nol-ome ni s’a co achou.
Distèlez-l’ èt aminez mèl.
3. Si ’ne saquî vis d’mande :
Poqwè fez-v’ çoula ?
Vos n’avez qu’a dîre :
Li mêsse ènn’a mèzåhe,
rad’mint èl rèvôy’rè chal. »
4. Ennè vont,
èt l’afêre s’èmantche
come on ’lzî a dit.
Djondant in-ouh,
å-d’fou, so l’pavêye,
is trovèt-st-on p’tit ågne atèlé.
El distèlèt.
5. Quéqu’onk dès cis qu’sont la
èlzî d’hèt :
« Qui fez-v’ don ?
Vos distèlez li p’tit ågne ? »
6. Et zèls dè rèsponde
come Jèzus ’lzi a dit dè dîre.
Adon on ’lzès lêt ’nn’aler.
7. Is lî aminèt insi li p’tit ågne,
èt adjins’nèt leûs frakes dissus.
Jèzus s’achît so l’ågne.
8. Sacwants stårèt leûs håres al tére,
dès ôtes kissèmèt dès fouyèdjes
qu’ont stu côpés d’vins lès tchamps.
9. Lès cis qu’rotèt so li-d’vant
avou lès cis qu’sont-st-al cowe
brèyèt d’ine seûle vwès :
« Hosan’na, såve don…
Il èst bèni l’ci qu’arive
å nom dè bon Diu.
10. Qu’i seûye bèni li rwèyôme qu’arive,
c’èst li rwèyôme d’a Dåvid nosse pére.
Hosan’na disqu’å d’zeûr dès cîrs. »
11. A. Jèruzalèm,
il inteûre è tampe :
i tape sès oûys so tot.
Mins l’nut′ tome dèdja.
i mousse foû po-z-aler a Bètanêye
avou lès Doze.
L’afêre di l’åbe ås figues.
12. On-z-èst li lèd’dimin.
Is moussèt foû d’Bètanêye.
Jèzus assotih di faim.
13. D’å lon,
il aporçût in-åbe ås figues
qu’a sès foyes.
i rote dreût d’ssus :
mutwèt î trov’rè-t-i quéquès frût′ ?
Mins ine fêye å pid d’l’åbe
il a bê loukî,
i n’veût qu’dès foyes :
ci n’èst nin co l’tins dès figues.
14. Adon il arinêye l’åbe
tot lî d’hant :
« On n’magn’rè måy pus d’tès frût′
èt çoula po tofér. »
Sès discipes l’oyèt.
Lès vindeûs tapés foû dè tampe.
15. Is m’nèt a Jèruzalèm.
Il inteûre è tampe.
Il atake a ’nnè taper foû
l’atèlêye di vindeûs èt d’atch’teûs
qu’î t’nît botike.
i bouhe djus
lès tåves dès candjeûs d’çans′
èt lès tchèyîres dès martchands d’colons.
16. I n’supwète vor’mint nin
qui po-z-avu pus coûrt
on trivièrse li tampe
tot pwèrtant ’ne saqwè.
17. Elz’ac’sègne èt ’lzî dit :
« N’è-st-i nin scrît :
Mi mohone èst loumêye
mohone di priyîre
po totes lès nåcions.
Et qu’ènn’av’ fêt :
on r’pêre di brigands. »
18. Lès Mêsses dès Prêtes
èt lès Docteûrs di li lwè
ont-st-oyou djåzer d’çoula.
Ossi ont-is è l’îdèye
di s’ènnè fé cwite,
tot si d’mandant å diâle kimint.
Ca is ont sogne di lu :
awè,
lès djins sont tot makés
tot hoûtant si-ansègn’mint.
19. Et qwand l’nut′ tome,
i mousse foû dèl veye.
L’åbe ås figues sowe èvôye.
20. So l’å-matin,
is r’passèt avår-la.
Is vèyèt l’åbe ås figues
souwé disqu’ås rècènes.
21. Pîre adon s’sovint.
i dit a Jèzus :
« Mêsse,
loukîz′ on pô l’åbe ås figues
qui v’s avîz mådi,
vo-l’-la tot sètch’. »
22. Jèzus lî rèspond
tot ’lzî d’hant a turtos
« Ayez fwè è bon Diu.
Awè,
vor’mint dji v’s èl dit,
23. si ’ne saquî dit a ç’montagne chal :
bague foû d’la
èt tape-tu èl mér…
sins avu li pus p’tit dote
è fond di s’coûr ;
mins qu’avou ’ne fwè bin vikante
i creût qu’çou qu’i dit
va s’fé so l’côp :
adon dji v’s èl dit,
por lu çoula sèrè-st-insi.
24. Awè vor’mint,
tot çou qu’vos d’mand’rez
è vosse priyîre,
tot-z-èstant sûr
qui v’l’avez dèdja r’çû,
çoula sèrè-st-insi por vos. »
25. Qwand v’s èstez so pîd po priyî,
si v’s avez qwè qui ç’seûye
disconte in-ôte,
rimètez sins r’proche,
26. po qo’vosse pére dè cîr, lu ossi,
vos r’mète totes vos frawes. »
Quî vis a d’né l’dreût dè fé tot çoula ?
27. Is m’nèt a novê a Jèruzalèm.
Jèzus s’pormonne è tampe.
Lès Mêsses dès Prêtes,
lès Docteûrs di li lwè,
èt quéquès anchins
m’nèt dreût sor lu èt d’hèt :
28. « Par quéne fwèce
fez-v’ tot çouchal ?
ou pus djustumint :
Quî v’s a d’né l’dreût
dè fé tot çouchal ? »
29. Jèzus èlzî rèspond :
« Dji m’va vis d’mander ’ne saqwè.
Rèspondez-m’,
èt adon dji v’dîrè
di qué dreût dj’ adjih :
30. Li batème d’a Dj’han,
èsteût-i dè cîr
ou dès omes ?
Rèspondez-m’ la d’ssus… »
31. Is ram’tèt inte di-zèls
si d’hant :
« Si nos rèspondans : dè cîr,
i va nos dîre :
Poqwè adon ni l’av’ nin crèyou ?
32. Mins wèz’rans-gn’ dîre : dès omes ? »
Is fruzihèt d’sogne dès djins.
Awè,
turtos prindèt Dj’han po on profète. »
33. Is rèspondèt don a Jèzus :
« Nos n’sèpans nin. »
Jèzus èlzî dit :
« Mi non pus dji n’vis dîrè nin
di qué dreût dj’adjih. »