Tot tchamps-payis, avou mès parints, nos ‘nn’ avans faît dès tch’mins ! Pont d’aviyon, pont d’ôtèl, l’aventûre en vwètûre, lès cârtes èt li p’tite rôlète po compter lès kilomètes.
Li France, do nôrd au sûd, do lèvant au coûtchant, l’Italîye, li payis d’ mès vîs parints, d’où qu’ c’èst qu’on cause avou lès mwins.
Jusqu’à ç’ qui l’ Suisse nos-èpwarte dins on stoûrbion sins fin.
Li Peugeot ratindéve ci momint-là tote ènondéye, prète à nos mîner, causu sins r’wètè, jusqu’à nosse pitit paradis à Champex dins l’ Valaîs. Èle kinochéve lès vôyes èt lès ruwales dès p’tits viyadjes qui lès parints avint tchûsi d’ trèvautchè. « Lès autoroutes sont faîtes po lès djins qui sont pressès d’arivè, qui n’ont nin l’ timps, come nos, d’admirè lès biatés do l’ natûre èt dès tèrasses si bin florîyes… » dijéve-t-i nosse grand powéte di pére !
È l’èstè come è l’iviêr, nos n’ mankins nin d’ fè l’ vôye po s’ ripwasè dins leû p’tit chalèt agripè au flanc do l’ montagne. Prèmîrès comissions mon Onésime, li botikî do viyadje, èt s’ Saînt-Bernard di tchin qui fiéve li fièsse aus parints en lès r’veyant chake an.
Dji n’î aî stî qu’ deûs côps è l’iviêr. Maîs zèls, fè do ski d’ fond en-n-amoureûs tot-autoû do lak èdjalè, à costè onk di l’ôte, ça fiéve pârtîye di leûs p’tits plaîjis d’ tos lès djoûs.
Sovint, i trèvautchint l’ lak, one miète sèrès, c’èst l' vraîy, maîs li spècheû do l’ glace estéve rapaujante.
Lès roteûs, lès skiyeûs, lès patineûs, lès sclides, ni s' ont jamaîs r’trovu au fond po taper one divise avou lès pèchons.
C’è-st-è-l’éstè qu’ dj’aî r’sintu lès prèmîs sines d’one istwêre d’amoûr qui n’a jamaîs conu d’ fin. Li powézîye dès pîd-sintes, à pwin.ne afroyîyes dins lès bwès d’ sapins aus sôlantès sinteûs. Li tchîpiadje dès ruwaus qui s’ covèrinèt inte les rotches. Sovenances mouwéyes à l’aprotche dès pasturadjes di hôteû èt do chîletadje dès clotches pinduwes au cô dès vatches. Lès tropês î pachèt do prétimps à l’ariére-saîson.
Adon, on son pus soûrd, qu’on ètind did bin lon, c’èst l’ ci do l’ rin.ne qui vint sovint au d’vant dès roteûs po l’zî dîre qu'i sont lès binvenus.
L’iébe î èst crausse, rilûjante… èle faît pinser à do v’loûr. A mèseure do l’ montéye, èle divint pus râre po lèyi place à quéques mèlêzes, quéques sapins.
Ès-t-i bin sâdje di wasu aler pus hôt ? Si piède; nin r’trovu l’ viyadje, lès parints, Onésime èt s’ tchin ! Maîs vos pas sont lès maîsses èt vos, vos n’ plez rin fè conte voste invîye d’ comunyî avou ç’ natûre-là qui vos n’ pinsîz jamaîs qu' egzistéve. Èle vos assatche come on-aîmant, èle vos-èpwate todi pus hôt. On crwèse vèci-vèlà dès cayutes di bèrdjîs, lès patures sont bin rade avaléyes pa lès grandès rotches brouchetéyes pa l’ vint.
I chwache fèl, à fè awè peû au pus hârdi dès roteûs ! Èt i chufèle èto, come dins on roman d’Emily Brontë. Li montéye si faît pus rwède, li rotadje pus londjin. On d’vint djalous dès bouquetins qui vos v'nèt agrignè en potchant d’one rotche à l’ôte, subtils come dès spirous.
Dins l’ pîd-sinte, dès blankès tatches aparètèt tot d’on côp. Èst-ce on djeû po vos fè passer l’ timps, po vos-ècoradjè d' monter pus hôt por vos vèy qwè ? Li nîve èst bin là, à vos pîds. Èlle a arivè catchètemint ca èle ni vos wase fè avèr peû pace qu'i gn-a co brâmint à monter !
Djoker… on n’ sauréve aler conte.
Fè one pwase bin pus longue qui lès ôtes po mète lès guètes, apruster l’ piolet. Asteûre, c’èst do sérieûs. Min.me si vos-èstez tot-ènondè, on n’ pout nin fè ç’ qu’on vout. C’èst l’ montagne qui dècide, èlle a tot à dîre èt vos n' avez qu'à l’ choûter !
C’è-st-on mouwadje à n’ s’ è nin fè one idéye qu’on r’sint tot là-hôt, come li sintimint di n’ rin ièsse, ou si pô, au drwèt d’ totes cès mervèyes-là. Lès grandèssimès crèsses ont mètu leûs blancs tchapês. Li hôte montagne rissatche si mantê d’ brume. Dji su au-dzeû des nuwadjes qui d’morèt acrotchès tot lauvau.
On rovîye vite l’èfwârt drânant do l’ montéye. Vos n’avez nin d'dja ausse di r’diskinde dins l’ valéye, qu’a divnu on p’tit pont qu’on-z-ad’vine à pon.ne, èt-z-î r’trovu l’ trayin do monde d’asteûre.
Tot-au long dès djoûs èt dès anéyes, lès montagnes ont divnu mès copleûses. Èle m’ont aprivwèsè…
Dji n’aî jamaîs stî pus hôt qu’ 4000 mètes maîs èst-ce vraîmint ça qui conte ? N’èst-ce nin ç’ meur di nîve-là, li passauje dès Chandîyes, à 2796 metes, qui vos-avez gripè en fiant dès zizonsèsses di treûs quate pas, on pîd après l’ôte, dès-eûres au long. Adon, rèche su one crèsse qu'i vos faut ascauchè po-z-aporçûre lès glaces pad'zos vos, èssôrçulantes à côper l’alin.ne, èt qui l’ vint faît tchanter. On tchant jamaîs ètindu, come on tchant qui vinréve dès profondeûs do l’ têre.
Maîs c’èst surtout l’ silince… li sôlant silince dès hôteûs qui vos r’toûne, côpè à momints pa one criyaude cwârnaye qu’on lome, véla, one tchawe.