JAQUE ELL’COIRBEAU QUI VOUT FAI D’L’AIQUE.
In Bedot estét prî in joû pa l’grawe d’enne Aique,
Quî l’sachèt in l’aire in volant,
In Coirbeau qui l’woétét, coét qu’il estèt in réque,
Pou li woèti dain fai ostant !
Cligne ess’nouye su l’troupeau, choésît l’pu bia dè l’binde
Çai s’qu’on plét dire in bia Bèdot !
Qui d’vét tourner l’lédmoin, à cotelettes, à gigots !
I l’mougnèt d’ja d’sés ouyes ! i desquin d’sû pou l’printe
Mai v’la sés grawes dain l’laine ! pu moèyin d’lès ravoèt !
Pu s’qui satche, qui pitèye, et pu c’qu’il est coumelet !
Vô zauri dit qui pestèlét,
Du cherbon pou fai dés bougnéts !
Mai l’sinci l’voét ! rade i l’lapougne pas s’gâye !
L’mét dain n’gayolle pou sès z’effants,
Li, quî v’lét fai comme l’Aique, du foire et du findant,
N’chièfe pu pou lés mârmots, qué d’passe-tins ét d’gagaye.
C’est q’quand on interprin n’saquoé,
Pu taure pou n’né dé vire dés griches,
On d’vret toudi woèti d’tout prét,
Q’ça n’fuche né trop au d’zeû d’nos siches :
In fiant ainsi lés geins s’rint sâches, bin avisét,
On n’virèt pu ostant d’banq’routtes !
Dain lés minnâches, ôstant d’dèrouttes !
D’geus’ries eièt d’vôl’ries, d’floûerîes ét d’geins ruinnéts.