Tûzadjes so lès djoûs d’oûy.
Lès imaudjes forvèyûwes
Li maujon francèse MATRA vint d’arèche one novèle èvincion: lès imaudjes forvèyûwes. Nos avans rèscontré l’ dirècteûr do Çante di R’cwèradjes èt d’ Discloyadjes di MATRA voci, èl Walonîye, Tîri Delbûre, èt s’ di lî d’mander qwè.
Li gazètî dèl Rantwèle: Moncheû Delbûre, ça fêt qu’ c’èst po dabôrd, insi, lès novias avancemints so les tèk’niques dès-imaudjes forvèyûwes?
Tîri Delbûre: Plê-st-à Diè, ci sèrè vindåve po dins on-an ou deûs.
L.R.: Qu’èst ç’ qui c’èst d’ ça por one saqwè, au jusse?
T.B.: Mètans on match di fot’bal inte li Standârd èt Dinamo Moscou. Nos sèrans capâbes di fé vèy, mètans lès rèclames po lès spas, sicrîtes avou l’alfabèt normal aus Bèljes, èt avou l’alfabèt cirilique aus Russes.
L.R.: …maugré qu’ li filmurèce sèrè todi l’ minme, èt lès rèclames èto?
T.D.: Jusse! C’è-st-o botique, ètur li r’cîyadje èt l’èvoyadje di l’imaudje qu’i gn-aurè l’ candjemint.
L.R.: Quî ç’ qui v’ va payî po ça: lès èquipes di fot’bal ou lès tchin.nes di tévé?
T.D.: Là l’ neûd, di-st-i l’ soyeû! Naturèlmint, tchèconk prêtche po s’ tchèpèle, come d’aladje. Lès èquipes di fot’bal ont d’ todi pus d’ rûjes po viker. Èles ni sont nin foû tchôdes po co dès sorcostadjes. Di l’ôte dès costés, lès tchin.nes di tévé pîlèt pace qui l’ filmadje dès grands match lèzî costêye todi pus tchîr. Lès r’wêtants dès tchènaus broûyîs, zèls, ni sont mutwè nin prèssés à lèyî r’monter leû payadje jusse po l’ plêji d’ vèy, mètans, Spa-Monopole sicrît à Lîdje avou dès lètès-arâbes.
L.R.: Ça vout dîre, avou, qu’on pôrè tchauspougnî lès imaudjes; qu’on n’ sèrè mauy pus chûr qui lès ciles qui vos r’cîyoz, par ègzimpe d’Irak ou qu’ c’èst d’Iran, n’auront nin yeû stî k’pôtyîyes. Pa ègzimpe po muchyî l’ vrêy, à cauze qu’on vout bassiner po Saddam ou po Khomeini, non.na?
T.D.: Savoz bin, cite ahike-là ni date nin d’audjoûrdu. C’èst VBC, si djèl tins bin, qu’a-st-avoyî, on djoû, on rèsponda da Fidel Castro, qu’a stî fêt pa on rapwarteû mo c’nochu. Ci n’a stî qu’one hapêye pus taurd qu’on a sèpu qui nost-ome n’aveut djoûrmauy rèscontrè li « leader máximo ». Il aveut-st-èmantchî si y-adjauzia tot r’plakant dès-imaudjes one dissu l’ôte divins one tchambe d’on grand ôtel di Miami.
I sèreut tins qu’ lès gazètîs - èt lès cauzeûs o posse, dayeûr - s’ayîvinche dès rîles di k’dûjance à môde di djint. Èt dès finès strètes, co bin! Èt di n’ nin todi volu y-èsse li prèmî po fé on « scoop ».
Lès marchaus l’ sèpèt bin, duwô: po fé one sicoupe, don, il èst d’ kèssion di bin r’loukî li mètau qu’on v’ done. Ci n’ dut nin y-èsse do blanc fièr, savoz.
L.R.: Ha ha ha! Mèrci brâmint dès côps, moncheû Delbûre.
T.D.: I gn-a rin avou ça, ô. C’èstè quand vos v’loz, don.
Note Wikisourd
Tecse sicrît après l' mwaisse modêye e «rfondou timprou» li 29 di nôvimbe 1994; ci modêye ci î est lomêye «è mîtrin walon , avou l’ vî scrîjadje Feller». Pu esplikêye insi : li mîtrin walon èst come on vrê walon k’on cåzréve po d’ bon inte Cînè, Måtche èt Hu ou avårlà (Lorint Hendschel).