- Ah, i gn-a nén à dîre, mins s’n-anéye-cî, dj’é stî gâtè !
Dieû sént èl nombe di côps qui p’tit Louwis aveut lachi s’frâse-là dispus l’bon timps. Vos l’pinsèz bén ! Ca aveut cominchi avou l’Euro di fotbale en Swuisse èt en-Otriche. Rolà l’Espagne aveut gâgni. Pou continuwer, c’èsteut l’toûr di France woù-ç’qu’on a d’vu ratinde èl dérène samwêne pou vîr èl vré class’mint dins lès Alpes. El grand côp, ça a stî lès Djès Olympiques en Chine. Rolà, gn-a yeû dès r’pôrtâdjes dins l’bwêsse à imâdjes, t’t’ossi bén à wit eûres du matin qui d’èl gnût. Pourtant, on s’dimandeut çu qu’i d-aleut s’passer lauvau. Dès mwès di d’vant, on nos-a d’visè dès drwèts d’l-ome qui gn-aveut nén èt dès problèmes au Tibèt. El flame Olympique a sti tchawutéye à r’lâye dins bran.mint dès payîs woù-ç’qu’il a min.me falu suprimer au passâdje lès cèrèmonîyes. Pou chûre, dès omes politiques ont r’fusè d’ès’ rinde à l’ouvèrtûre dès Djès. Etou, dès lûteûs di tous lès spôrts ont rèspondu qu’is r’fusît d’è nn’aler concouru, èyèt çoulà pou in moncha d’résons. Yène dès dérènes, c’èsteut à côp seûr èl polucîyon. Lès chinwès avit d’ayeûrs djusqu’à fén djoquer dès-usènes èyèt dès-autes boutit au ralenti. Lès vwètûres roulit in côp pa plaque pére èyèt l’lèd’mwin lès impéres. On-a d’mandè aus djins di prinde condjî durant lès Djès.
Tout d’min.me, èl 8 du mwès d’awous’ à 8 eûres 08 au gnût, lès Djès ont cominchi avou ène bèle cèrèmonîye. - Li stâde qui m’a l’pus mârquè, c’èst l’cén qu’on lome « èl nid d’mouchon », avou lès 42 mille tones d’acî pou l’monter. On p’leut stitchi d’dins 90.000 spèctateûs. C’è-st-ne construc.sîyon qu’a durè cénq anéyes avou pa momint 5.000 ouvrîs qui boutît.
Qwè qui, on-a apris pa après qui dès-imâdjes d’èl cérémonîye avît stî arindjîye pa ordinateûr. Sins compter qu’èl pètite fîye qui tchanteut n’èsteut nén l’cène qu’on ètindeut (djujéye nén assèz djolîye pa lès-Autoritès d’lauvau).
Bén seûr, come tèrtous, on-a dès spôrts préfèrès. Quèstîyon pléjî lauvau, gn-a yeû wêre. Sinon èl fotbale. Lès-èspwêrs avit fét ène boune campagne pou s’qualifier. Dins-ène sérîye avou l’Nouve-Zélande, èl Chine èyèt surtout l’Brésil, i n’faleut nén trop crwêre au miraque. Et ça aveut mau cominchi avou èl yin à rén pou l’Brésil. Lès deûs-autès pârtîyes, is lès-ont gâgnis. Pou chûre, on r ‘ténra l’victwêre 3 à 2 èyèt l’éliminâcîyon di l’Italîye. Lès-èspwêrs du fotbale bèlje èstit en d’mi-finâle èl méreseûle èquipe d’europe avou l’Nigéria, l’Ardjintine èyèt l’Brésil. Mins, pou lès d’mi, is-ont stî spotchi pa l’Nigéria pa l’ès’core di 4 à 1. I d’mèreu l’pètite finâle èl vèrdi conte èl Brésil, mins lès èspwêrs ont stî batu trwès à rén.
Pou nos-autes lès walons, c’èst broke di viole pou ène mèdâye. Lès flaminds avou Tia Hellebaut en wauteû d’ont yène d’ôr, sins roubliyî l’ârdjint du 4 fwès cint mètes dès feumes. On r‘ténra èl nadjeû Michael Phelps qu’a gâgni 8 mèdâyes d’or (èyèt co èl chîfe pôrte-bouneûr dès chinwès). L’ome qui tchausse du cénquante a dispassè Mark Spitz qui d’aveut rècoltè 7. Etou l’ome èl pus rapîde, èl djamaîcain Bolt avou sès deûs mèdâyes èyèt sès deûs r’côrds du monde su cint èt deûs cint mètes.
Lès djès chinwès ont rachonè 11.128 spôrtifs di 205 payîs durant 16 djoûs. Is gn-aveut 96 bèljes. On-a distribuwè 302 mèdâyes d’ôr. L’évèn’mint a stî couvru pa 30.000 gazètîs, omes di radîyo ou di bwêsse à imâdjes. Lauvau, i gn-aveut 74.615 volontéres r’crutès pau comité dès Djès. Asteûre, nos ratindrons Londes en 2012.