El dérin Grand Pris di formule yin d’è valeut lès pwênes avou èl tite qui n’èsteut nén co djouwè. Gn-aveut co deûs coureûs qu’avît d’l-èspwêr. D’in costè Lewis Hamilton èt di l’aute Nico Rosberg. C’è-st-à Habou Dhabi qui tout d-aleut s’dècider. Inutîle di vos dîre qui P’tit Louwis èsteut pa-d’vant s’bwêsse à imâdjes pou chûre èl coûsse. Il âreût p’lu s’passer n’impôte qwè dins l’coron, faleut qu’i fuche pa-d’vant s’n-ècran.
L’ome con’cheut quasimint tout dissus l’viquérîye dès deûs mwin.neûs.
Il âreût p’lu vos dîre qui Lewis Hamilton ès’ displaceut en-avîyon privè, yin qui cousteut 23 mîyons d’Euros. Etou qu’il aveut dès dîyamants dins lès-orâyes èt qu’ès’ drwèt bras ‘steut tatouwè.
Poureut-on lî r’prochî tout çoulà èt tous lès sines di ritchèsses ?
El coureû aveut stî al’vé dins- in p’tit apartumint. Dès parints séparès, il aveut souvint dôrmu dins-in fauteuy’ pace qu’ès’ pa ènn’ saveut louwer èn-apartumint avou deûs tchambes. P’tit Louwis saveut qu’à l’âdje di chîj ans, ès’ pa lî ofreut in kârt. C’è-st-insi qu’èl gamin s’aveut pris au djè èt qu’èl cousse d-aleut d’vènu pour lî ène passîyon. Dèdjà adon, i rèpôrteut lès cousses dès difèrentès catégorîyes. C’èst Ron Dennis, èl patron di Mac Laren qui dècide di chûre lès coûsses du gamin d’à pwène wît ans. Après l’kârting, ça a stî l’monoplace.
Di nos djoûs, il èst pus paujère èt bén dins sès soléns en compagnîye d’èl djolîye Nicole Scherzinger ! Mins ça n’a nén toudis stî insi. El pètite Nicole abutuwéye au monde d’èl gnût, d’èl droque èt di l’alcol, aveut n’wéje idéye dissur lî !
Adon, il aveut min.me fét in stâdje di survîye mon lès paras pou l’èr’mète bén dins s’tièsse. Asteûre, ça va mîyeu. Il èst bén dins s’pia èyèt i fét mwins d’èreûrs qui d’dins l’timps.
D’èn-aute costè, c’èst Nico Rosberg, èl gamin da Keke, lî ètou tchampîyon du monde. C’èsteut en 1982.
Lî, il âreût pus râde ène viquérîye dès pus paujères èyèt ène feume cultivéye. Estant p’tit, i chûveut d’djà s’pa dins lès « padoks ». Pou lès liârds, i gn-aveut pont d’trèyins. El famîye Rosberg èd’mèreut d’ayeûrs à Monaco. Ca v’leut tout dîre. Lî ètou, il a cominchî pau kârting. Mins d’èn-aute façon qui Hamilton. Vos l’pinsèz bén avou lès liârds èyèt lès r’lâcîyons d’ès’ père, il a rad’mint trouvè lès mèyeûsès-èquipes. Rosberg a fini pa s’fôrdjî in nô en gâgnant dès coûsses. Il a falu l’timps : pont d’côps d’ès’clats ou bén di bièss’trîyes. On n’pâle nén biacôps d’lî dins lès lîves à sensâcîyons. Il a mâriè Vivian, ène ârtchitèque i gn-a wêre di timps.
El difèrence dins lès deûs mwin.neûs, c’èst tout d’min.me qui ès’séson-cî, Hamilton a gâgnî 10 Grand Pris conte cénq à Rosberg qui lî, a yeû pus di place d’oneûr.
Divant d’cominchî, gn-aveut 17 pwints intrè lès deûs, mins pou l’dérin Grand Pris, lès pwints cont’nut doube.
Rosberg è-st-èvôye èl preumî, mins ça n’a nén durè longtimps. A cause d’in patin’mint dès rouwes, Hamilton èl dispasse. Pou chûre, il a min.me yeû in problème di moteûr qui l’a èspétchî d’ès’ bate pou l’victwêre èyèt pou yèsse tchampîyon du monde. Ca arindjeut bén Hamilton qu’a insi rèpôrtè ès’ onzième Grand Pris d’èl séson. El pilote Mèrcédes p’leut yèsse sacrè tchampîyon du monde 2014 après l’tite di 2008. El duwèl au solîya ‘steut fini èt Habou Dhabi aveut livrè s’sècrèt.