- Tout d’d’min.me ! Gn-aveut èn-an qu’on l’ratindeut !
L’Euro 2020 è-st-arivè.
I n’s’aveut nén fét l’anéye passéye à cause du Virus. Avou lî, in moncha d’afêres candj’nut : on r’trouve dès djins dins lès stâdes, on roublîye èl distancîyacîyon, on lèye lès masques dins sès potches, …
Gn-aveut 24 èquipes mètuwes en chîj groupes. Lès bèljes tchèyît conte èl Russîye, èl Finlande èyèt l’Dan’mârk. El pus-impôrtant, c’èst qu’ça s’passeut dins 11 payîs.
Après in 3 à rén aujîye conte èl Russîye, on crwèyeut qui ça s’reut du gatau conte èl Dan’mark. Mins l’problème di santè da Eriksen a candjî èl done : lès vikings èstît distchin.nès. Après deûs munutes, Denayer a ofru in cadau èyèt on s’a d’mandè çu qu’i s’passeut Gn-aveut qu’ène èquipe su l’tèrèn. Lès danwès voulît gâgnîs. Mins l’rintréye de De Bruyne a fét grand bén èt quand à l’ 55 ième, Lukaku s’a scapè pou passer à De Bruyne, Torgen Hasard a yeû aujîye di r’mète lès deûs èquipes à égalitè. Pa après Eden Hasard èyèt Witsel ont rintrè ètou. El djeû dès bèljes a montè en pwissance èt co in côp, c’èst Lukaku qu’a assatchî dès djouweûs. De Bruyne n’aveut pus qu’a mârquer : c’èsteut deûs à yin pou lès diâbes !
- C’èsteut mau pârtî, mins rolà, toute èl Bèljique pousseut in ouf di souladj’mint !
El trwèsième pârtîye a stî aujîye conte èl Finlande.
Mins avou lès witîyème di finâle, l’s-afères cominchît vrémint : no payîs èrcuveut l’Portugal, èl tchampîyon en tite. El binde à Ronaldo ènn’ s’a nén lèyî fé, mins lès roudjes diâles ès’ sont tout d’min.me qualifiès avou dès djouweûs portuguès mètchants pa momint adon qui l’ârbite ènn’ wèyeut rén !
El vôye di l’Italîye ès’ drouveut en quârt di finâle adon qu’èl France ès’ fèyeut taper à l’uch’ pa lès suisses. El vèrdi 2 d’awous’, no payîs ‘steut don pârtadjî en deûs, djusse après z-awè fièstè l’acôrd dès-omes conte du tchèrbon qui dateut d’i gn-a 75 ans intrè lès deûs payîs!
El pârtîye a bén mau cominchî : rad’mint l’Italîye a fét yin à rén. Pîre, is-ont mârquè in deuzième côp. Lès bèljes ont tout d’min.me, djuste divant l’ârmûre, mètu l’balon au fond d’èl gayole. Min.me si c’èsteut in côp di réparâcîyon qui Lukaku aveut rad’mint satchî, c’èsteut l’èspwêr qui r’vèneut.
- Enfin, bran.mint èl crwèyît ! Eyèt mi, èl preumî ! Mins c’èsteut bèrnike !
Lès roudjes diâles n’ont jamés seû èrvènu dins l’pârtîye. In côp d’pus, is-èstît tapès à l’uch’ d’in grand tournwè sins z-awè l’tchance di pouvwêr èl gâgnî !
- Mi, dj’é pus râde vèyu qu’i gn-aveut dès-individuwalitès qui djouwît conte ène èquipe qui fèyeut in bloc ! Swèt dijant l’èquipe qui lès-èspéciâlisses lomît « èl jénérâcîyon doréye » aveut co in côp ratè ès’ raploû !
Di l’aute costè, l’Angletére fèyeut s’pètit boulome di tch’mwin èt z-ariveut en finâle conte di l’Italîye. Ca s’passeut èl 11 di djulèt à Wembley. Rolà, lès deûs-èquipes n’ont p’lu s’dispârtadjî, min.me avou l’prolongâcîyon èyèt il-a falu satchî lès côps d’rèparâcîyon. En-ècsèrcisse qui l’s-italîyns èstît pus fôrts. Nos-avît insi èl gâgnant di l’Euro 2020.
Coulà fini, nos d’vîs nos rabate dissus l’toûr di France. Rolà, in bèlje a fét dès spites en gâgnant trwès-ètapes: yène avou dès cols, l’aute conte èl monte èyèt l’dérène au sprint à paris. Gn-a nén à dîre min Wout Van Aert è-st-in tchampîyon èyèt i n’a nén fini di nos surprinde.
Su no lancéye, gn-a lès Djès Olympikes qui chuv’nut avou ou sins djins dins lès gradins. El comitè a yeû deûr di dècider. Vive lès spôrts qwè !
Em’ cousse Lucîyin, qui d’meure bén lon à l’aute dibout du monde, âreut v’lu qui dji d’visse dès Djès Olympiques, mins pou bran.mint d’intrè nos-autes en Bèljique, l’Euro ‘steut pus-impôrtant. Min.me si, ès’ n-anéye-cî, no payîs a yeû dès bèlès mèdâyes. Di l’ôr avou lès djouweûs di hokèy, avou Nafi Thiam en èptatlon èt N. Derwael en djimnastique, di l’ârdjint avou Van Aert en vélo, du bronze avou M. Kasse en djudo, l’équipe di saut d’obstaque à tchfau èt Bashir Abdi en maraton.