El tchampîyonat d’Bèljique dins s’vèrsîyon 2021-2022 a yeû in p’tit côp d’frécheû grâce à l’Union. V’là in club orijinére di Brussèles èyèt minme di Sint Giles. Il-a v’nu au monde en 1897. L’èstâde èst pourtant mètu su l’Vile d’à costè. El matricule dîj èst dissus Forest. Lès djônes èt bleus ont, en 1931 r’baptisè leû stâde Pârc Duden pou Djosèf Marien. C’è-st-in dès clubs lès pus titès du fotbale bèlje. Il-èst ètou conu su l’nô di Union 60 avou ène sérîye di 60 pârtîye sins conèche èl défète. Is vèn’nut djusse d’èrmonter en div 1 qu’is-avît lèyî 48 ans pus timpe.
C’èsteut ène entrèprîje familiâle – ène mîyète come dins l’célèbe pîce di thèyâte da Bossemans èt Coppenolle, èrprîje co fén d’l-anéye à Châlèrwè
Eyèt après leû diskinde, is-ont stî rach’tès pa Tony Bloon èl propiètére di Brighton.
Is-avît d’meurè en 1B avou sakants côps d’èsclats come èl victwêre conte Andèrlecht 0 à 3 en coupe 2018-2019. Final’mint, is-ont ègadjî Felice Mazzu èyèt bran.mint di nouvias djouweûs en rèfôrt.
El séson 2020-2021, is-ont spotchî lès-autes avou 18 pwints d’avance dissus Seraing.
Er’vènu en Div 1, on lès crwèyeut n’sorîs pou l’tchatavou leû wêre di liârds èyèt leû vî tèrén.
Maugré ène râde éliminâcîyon en coupe, lès djouweûs di l’Union ont stî à l’tièsse du tchampîyonat durant toute èl séson.
Lès supôrtèrs ont minme rêvè d’in douzième tite di tchampîyon, 87 ans après l’dérin di 1935. Su l’fâse classike, is-ont batu deûs côps leû rival vijin Andèrlecht pa 1-3 èyèt 1-0.
Lès plés-ofs ont arivè avou come advèrsére l’Antwerp, Bruges èyèt co in côp Andèrlecht. Maleûreûs’mint, Bruges s’a mètu su leû vôye èyèt après lès-awè batu 0 à 2 su leû tèrén, îs-ont gâgnî 1 à rén au Jan Breydel. El gârdîyn Anthony Moris s’a mau ètindu avou in dèfenseû èyèt l’balon a stî dins l’gayole. Eyèt come gn-aveut in grand Mignolet èt qui Machida aveut stî tapè à l’uch’ à l’eûre di djeû, lès cârotes èstit cûtes. Maugré in fôrt bia tchampîyonat, c’èsteut fini dès-èspwêrs di l’Union. Andèrlècht finicheut trwèsième avou à l’cléf, in tikèt pou l’Europe.
Du costè du Spôrting di Châlèrwè, lès gades à rôyes avît arivè à z-acrotchi l’wagon dès plés-ofs 2. C’èsteut çu qui l’grand manitou du Spôrting v’leut au cominch’mint d’èl compèticîyon.
Is lyeûs d’meureut don chîj pârtîyes (èyèt deûs-autes si is-arivît preumi) pou z-awè l’fameû dérin tikèt pou djouwer l’Europe qui lès supôrtèrs rèclam’nut sins djoke.
On n’pout nén dîre qui çoulà s’a bén passè. Lès gades à rôyes ont stî batu à Malines pou cominchî èt pou chûre n’ont pris qu’in méreseû pwint su deûs pârtîyes dissus leû térèn. I faut dîre qu’i lyeû manqueut in bon ataquant buteû dispus qu’ Shamar Nicholson è-st-èvôye au Spartak di Moscou pou 9 mîyons d’Euros (c’èsteut djusse bén pou lès késses) ... minme si Vakoum Bayo fèyeut s’possîbe. Dispus, il-a stî transfèrè à Châlèrwè. Lès supôrtèrs comp’nut dissus Edward Still l’intrin.neû èyèt surtout su Medhi Bayat pou z-awè dès bons transfèrts qui tous l’s-ans n’ariv’nut wêre à fé in bon résultat come par-ècsimpe gâgnî ène saqwè èyèt surtout èl coupe di Bèljique. Quand au Standard di Lîdje, on-a bén yeû dins l’idéye qu’i daleut djouwer l’diskinde en Divisîyon 1B. I d-a falu wêre pou qu’çoulà arive. Ene séson a roubliyî au pus râde. Mins l’arivéye du groupe 777 a r’mètu du bûre dins lès-épinârds èyèt surtout dès liârds dissus l’tâbe.
El chûte à l’anéye qui vént !