- Mi, quand on m’ dit fotbale, dji pinse dirèque au tchampionat, ausès coupes d’Europe èyèt à l’coupe du Monde. Mins i gn-a ètou èl cén di tâbe qu’on lome èl kiker èt qui dj’é djouwè dins m’djon.nèsse (oyi ça va hin vos-autes, ça fét longtimps).
Pourtant, intrè lès deûs, i gn-a co èn-aute, c’èst l’mini fotbale ou pus râde lomè futsal, in mot qui vént d’in machâdje d’èspagnol èt di pôrtuguès. Litéral’mint, ça vout dîre fotbale di salon.
P’tit Louwis wèyeut voltî èl futsal. Il-aveut pourtant d’èl tristèsse dins s’vwès quand i d’è d’vîseut.
- Bén oyî, à tous lès côps, lès pârtîyes di minifotbale cominch’nut toudis viès dîj eûres èt minme dîj eûres èt d’mîye au niût. Min.me l ès cènes qu’ont done dissus lès tchin.nes di spôrts dins l’bwêsse à imâdjes.
Bén-ètindu, l’èspôrt a dès réques bén da li. I s’djouwe durant deûs côps vint munutes, mins l’ôrlodje ès’ djoque di toûrnér quand èl balon èst woute du tèrén. El tèrén, il-èst toudis dins-ène sale di spôrt. Lès gayoles fèy’nut dès dimensîyons di trwès mètes su deûs.
I s’djouwe à cénq djouweûs èyèt neuf autes djouweûs qui poul’nut rintrér (dins-ène pârtîye du tèrén bén-indiquéye pou l’rèplaç’mint) pou fé dès candj’mints durant lès quarante munutes.
Come pou l’fotbale, i gn-a ètou dès côps francs dirèques èyèt indirèques, mins ètou dès côps d’rèparâcîyon, sins roubliyî dès djônes èt roudjès cârtes. Si in djouweû a ène roudje cârte, i pou yèsse rèplacî pa èn-aute après z-awè purdjî deûs munutes di pènalitè. Come en baskèt èyèt à l’invèrse du fotbale, i gn-a dès fautes d’èquipe quand is-ariv’nut à chîj fautes.
Cu qu’i faut fé, c’èst di stitchi l’balon dins l’gayole di l’aute èquipe. I gn-a deû-ârbites mètus di chaque costè asto dès line di touche.
Ene afêre qu’i faut ètou sawè, c’èst qu’i gn-a pont di wôrs djè en mini fotbale.
Bén seûr, come dins tous lès spôrts, i gn-a in tchampionat en Bèlgique. Minme si gn-a deûs liques séparèyes pou l’Flande èt pou l’francofone. C’èst l’èquipe d’Andèrlecht (avou 34 tites di tchampîyon djusse qu’asteûre) qui mwin.ne èl danse. Amon nos-autes, deûs-èquipes di Châlèrwè djouw’nut l’tièsse du class’mint.
Cominchons pa Charleroi 21 Futsal, ancîyen’mint Action 21 ( qu’aveut gâgnî 10 tchampionats di Bèljique èyèt quate coupes di Bèljique, sins comptér ène lique dès tchampîyons) qui en, 2015 a fusionè avou l’Futsal Tchèslinia pou d’vènu l’Futsal Team Châlèrwè.
El deuzième èquipe ès’ lome Futsal My-Cars Charleroi èyèt c’èst d’vant tout ène istwêre di famîye avou lès fréres Karakilic èyèt Eric Simonofski qu’ont amwin.nès leû n-èquipe di Roselies à l’tièsse di leû spôrt.
El dérin dèrby intrè lès deûs-èquipes di Châlèrwè s’a fét à l’sale d’èl Garène mitan du mwès d’févrî. C’è-st-ène pârtîye qu’a toûrnè à l’avantâdje du Futsal My-Cars, mins qu’a stî ène bèle propagande pou l’futsal en Bèljique èt en Walonîye. Co d’pus, èle a moustrè qui Châlèrwè possédeut deûs bèlès-èquipes en divisîyon yin nacîyonâle.
Dji m’d-è voureu d’ènn’ nén dîre in mot dissus Mouscron-Estaimpuis Futsal fondè en l’anéye 2000. L’èquipe èst nettement mwins fôrte qui lès deûs-autes, mins n’impétche qu’èle èst capâbe di rèyalisér dès bèlès pârtîyes, min.me conte lès pus fôrtes.