- Ôdjoûrdu, dji m’ va vos d’vîsér da Marouane Fellaini qu’a décidè d’ès’ djokér di djouwér ô fotbale.
L’ome a v’nu ô monde èl 22 novembre 1987 a Eterbek an Bèljique. Il èsteut in fotbaleû intèrnacîyonâl bèlje avou l’ nacîyonaliè maroquène. In djouweû qu’on pout stitchî a plin d’ places, t’t-ossi bén an mitan dèfensif qui r’lèyeû ou co bén an soutén d’ataque. Es’ papa, Abdellatif, èsteut gârdîyn ô Raja di Casablanca intrè 1970 èt 1971 divant di r’jwinde èl Hassania d'Agadir. An 1972, Abdellatif Fellaini bague an Bèljique pou z-i djouwér, mins l’ Fèdèrâcîyon maroquène ènn’ vout nén lyi d’nér èl papî di sôrtîye.
A l’âdje di 7 ans, ès’ pa l’inscrît a Andèrlecht. Il y d’meure trwès-ans divant di baguer a Mons. Il y djouw’ra èyèt pou chûre ôs Francs Borins, ô Sporting di Châlèrwè èyèt il-arîve ô Standard a l’âdje di 16 ans. Ene anéye an réserve èyèt an 2006, i djouwe an Lique dès Tchampîyons conte èl Dynamo Bucarest. Dins l’ fouléye, i d’vént titulére an èquipe preumîyère. Su l’ fén di mai 2007, i pâle di s’èdalér paç’ qu’i n’ gâgne nén âssèz. El club finit pa trouvér dès liârds pou n’ nén qu’i s’è vâye. Surtout qu’i gn-a dèdja dès grandès-èquipes qu‘ont stitchî s’ nô dissus leûs tablètes. Il-èst d’vènu in grand djouweû avou Michel Preud’homme come antrin.neû. Minme si ès’ djeû âssèz deûr lyi fét awè branmint dès cârtes djônes ou co bén roudjes.
Il-a stî l’ome an fôrme durant lès Djès Olympiques woù no payîs a fini quatième.
Dès preumîyèrès rècompenses ariv’nut an 2008 avou l’ solér d’ébène èyèt l’ tchampionat d’ Bèljique.
An sètembe 2008, il-èst transfèrè pou 20 mîyons d’Euros mon l’ club d’Everton. El transfèrt èl pus tchèr pou adon èyèt l’ djouweû a djusse 20 ans. I fét bén seûr dès spites mon lès « Toffees ».
Es’ pus bèle séson lôvô, c’è-st-an 2012-2013. An novembe, il-èst mèyeû djouweû du mwès an Angletère. Il èst mèyeû buteû d’ès’ n-èquipe. Lès supôrtèrs èvont minme djusse qu’a stitchi ès’ fameûse pèruque su leû tièsse.
Eyèt an 2013, il èst transfèrè à Manchester United pou 32,5 mîyons d’Euros. Rola, avou l’arivéye da Louis Van Gaal, Fellaini prouve qu’il-èst d’vènu in djouweû avou dès grandès qualitès èyèt i mârque dès bias buts. Pou chûre, i conèt co èn-ôte antrin.neû, José Mourinho qui lyi fét confîyance.
An févrî 2019, Marouane Fellaini r’jwint èl club di Shandong Taishan an Chine qui lyi done in contrat bén djuteû avou in salère di 14,5 M€ net pa anéye.
Mins il-èst l’ preumî djouweû tèstè positif ô Covid. I dwèt yèsse ècârtè èyèt i s’èrtouve a l’opitâl. I r’vént an-èquipe èyèt an 2020, i fièsse èl preumî tite di tchampion di Chine avou s’n-èquipe. Es’ contrat finit fén d’l-anéye 2023 èyèt il-a 36 ans. Trwès mwès pus tôrd, il-anonce èl fén d’ès’ cârîyère fotbalistique.
Es’ carîyère an-èquipe naciyonâle, lèye, èle a cominchî avou lès djon.nes du Maroc. L’antrin.neû ènn’ wèyeut nén voltî ès’ djeû èyèt Fellaini s’a don toûrnè viès l’ Bèljique. I cominche avou lès-Espwêrs an 2007 qui djouwît conte èl Tchèquîye.
Pou chûre, èl djouweû èst convoquè pa Marc Wilmots pou djouwér l’Euro 2016.
Sélectionè pa Roberto Martínez, i pârticipe adon a s’dérène grande compèticîyon intèrnacîyonâle avou l’ coupe du monde 2018 an Russîye. L’ome èst co décisif an wuîtième di finâle conte èl Japon (3-2) an mârquant èl but d’égalisâcîyon, come bén souvint, dèl tièsse.
Marouane Fellaini aveut anoncî s’èrtrète intèrnacîyonâle èl 7 di mârs 2019 après 87 caps èyèt 18 buts don 11 mârquès dèl tièsse.
Escrît èl 9 di fevrî 202; eplaidî e rfondou dins l' Rantoele 109