Lë diâle da Can’va, ël a ègsësté. C’èstot-on p’tët cinsî ; mënâbe, ë fiéve dès toûrs, branmint, tot l’ monde ènn’a causé.
On djoû ël-èstot avou së p’tët tchaur, et one vatche… èt ë l’èva së l’ campagne dë Bauvètchén à Nodèbâye èt londje lë cinse Sëmal ; one grosse cinse ! Ët l’ cinsî èst là, avou sès vaurlèts dins l’ coû, èt ë wèt arëver l’atèléye, èt ë comince à s’ foute dè l’ diâle.
« Waîte më-n-ome… vatchî… Qwè ç’ qu’ël a por one atèléye-godé[1], tot quë osse, ë n’a pës rén quë tént, èt s’ foute, èt lès vaurlèt rîre. »
Èt lès vaurlèts, tot d’on côp :
« Fioz todë atincion, Maîsse ! Pace quë vos n’ savoz ni à quî ç’ quë vos-avoz à fé ! C’èst l’ diâle da Can’va d’ Tourëne. »
« Ô ! Djë m’ fou d’ ça ! èt… èt… c’è-st-on Ménapyin… më djë n’ crwè ni à ça. Djë crwè nî aus sôrcîres, djë n’ crwè ni à l’ diâle ! »
Tot d’on côp, m’ fë, Ë fiève tchôd, ë-n-avot dè solia, l’aîwe comince à monter dins l’ coû, èt dès mërâyes, ça r’djète dë l’aîwe à tot skèter. Èt ça monte, ça monte, ça monte ; qu’ël atrapenèt d’ l’aîwe djësqu’à leû golé, prèsse à-z-èsse nèyî ! Mins, c’è-st-one grosse cinse, èt l’ diâle avot contënouwé s’ vôye èt ël èstot d’ l’ôte costé dè l’ cinse, à l’ pwate. Èt l’ cinsî, abîye, à criyî :
« Diâle ! Diâle ! faît one saqwè ; on s’ va nèyî ! »
« Auwe ! » dë-st-ë l’ diâle. Ël arète së tchaur. Ë n’a ni waîti. Ël a ralëmé s’ pëpe, èt :
« Yû ! »
On ravance, èt l’aîwe a comincî à dëskinde. Èt dëpôy adon, lë gros cinsî dè l’ cinse Sëmal, chaque côp, qu’ë passéve, èt qu’ë rèscontréve lë diâle, on r’ssatchéve së casquète po l’ maîsse po lès gros cinsî, c’èstot l’ gros cinsî quë tëréve së tchapia !
« Télemint qu’ël avot stî sèré… come po tchîre !
- ↑ atèléye-godé : ça vous dîre : one atèléye èmantchîye come on tch’vau-godé, èvou tout qui brinquebale.