« Jamaîs ! Quèwat’, vos m’ètindoz bin, jamaîs ! C’èst mi qu’ vos l’ dit, li p’tit Mimile mon l’ Cicile n’aveût nin d’ pus d’ quarante ans quand il a faît l’ grand nuk. »…
Vola qui l’ Mèmêr nos va co gâter nosse paurt di couyon. Faut todi qu’i rataque avou l’ Quèwat’. C’è-st-au cia qu’ârè li d’zeû su l’ôte po dès quèwes di cèréjes. Èt c’è-st-au cia qui pôrè avancî lès preûves qu’on n’ sârè aler conte. On s’ fout bin d’ l’âdje do Mimile li djoû qu’i s’a mètu al lache. Mins c’èst come ça, tos lès deûs pus bourique onk qui l’ôte. I pèstèlenut dins leûs « Djè l’ sé mia qu’ vos » po bin mostrer qu’i n’i conèchenut rin.
Li prumî cause pus fwârt. Li deûzyinme prind s’ grosse vwès. On n’ s’ètind pus.
« Sère ti trape, don ! Li Mimile, il à skèpyî yinte mès deûs nèveûs, èt zèls, il ont… Taudje one miète… Â ! bin waîte, v’la qui dj’ nè l’ sé pus ! Li pus vî à one cope d’anéyes dipus qui m’ crapôde. Il ont faît leûs pauques èchone pace qu’il èsteût one miète coudu su l’ doûs. »…
À s’ trimèler dins lès comptes dès-âdjes, li Mèmêr a distribouwé one caute di rawète sins l’ volu !
« Bravô ! L’ gros ! Ti t’as comachî dins lès cautes, ripasse dissus l’ pot, ça t’apudrè à sèrer t’ bètch ! »
Vos savoz bin qui quand on s’ comache po doner lès cautes, i vos faut r’mète one pîce dins l’ pot. Nos-ôtes nos n’ djouwans nin gros : on franc l’ pli, deû po l’ gangne, èt l’ cia qui faît dobe tot seû, i lève li pot èt on-z-è r’drouve on novia. Totes lès gangnes è vont dins nosse taye. Sur one vièspréye, li cia qui n’a pont d’ chance, ni pièd jamaîs d’ pus d’ cinquante francs. Di l’ivièr quand lès vièspréyes durenut pus lonmint, nos purdans bin yût’ eûres po djouwer. Vos m’ dîroz qu’ c’è-st-one djoûrnéye d’ovradje ça, longue come on pania di tch’mîje, mins à nos-ôtes, ça nos chone byin coût ! Nosse ricôrd, ça a stî vint-y-one eûres sins r’lache, on djoû qu’il aveût nîvé. On n’ veût nin lès-eûres couru quand’ on-z-èst d’ boune compagnîye, è culot, li dos à li stûve, one boune jate di cafeu ribatijî au pèkèt d’zo mwin, èt lès galètes do cabaretî. On n’ va tot l’ minme nin s’ lèyî tchaîr à bokèt avou dèl misére.
Ci qu’on mèt dins l’ pot, c’èst jusse po fé moussî, on n’î gangne rin, nin come l’Ètat avou l’ loterîye. Nos-ôtes, nos-èstans drwèts dins nos chabots, èt nos donans d’dja bin assez d’ nos p’tits caurs à cèt’la qui nos min.nenut, èt qui s’ pâyenut dès solés d’ crocodile su nosse dos, à dîs mile francs por onk. Qui lès viêrs leû mougnenuche leûs-ârtias èt co tot l’ rès’ ! Onête come nos l’èstans, nos calans totes nos piètes su l’ gagnote do cabarèt, èt chaque anéye, al lèvéye, on s’ pâye on bon din.ner d’ curé. Nin on din.ner d’aspanse, ça non.na ! Mins on bon din.ner, dins one boune maujone à trwès stwèles, deûs : ça sèreût one miète trop pau, quate : on n’a jamaîs assayî, on rîreût d’ nos.
Dins lès trwès stwèles, i-gn-a onk nin lon èri d’ Pèrwez. Dji n’ mi sovin jamaîs comint qu’on l’ loume, ratindoz, ça m’ va rivnu, ça dwèt yèsse « Aus deûs couyîs », ou co bin « Au tchôdron »… nin « Au deûs loces », nin « Au trwès clés » non pus, pace qui m’ nèveû qu’è-st-one miète pus dispièrté qui l’ nèveû d’ l’ôte apostrofe, boute dins on gâradje al sôrtîye di l’autostrâde. I-gn-a dès Brusselaîres què lî avin’ dimandé èwou qu’i pourin’ mindjî on bokèt :
« Rotez « Aus trwès clés » à l’intréye di Djibloû. »
Mès-omes, il ont stèpé èvôye pa d’ l’ôte costé, su l’ vôye di Djodogne, i n’ riconèchin’ dèdja nin leû drwète. C’èst nin co dès parèys qui sârin’ min.ner on tch’fau au cwardia. I-gn-a onk di zèls qu’a scrît au garadje po dîre qu’on s’aveût foutu d’ li. Ratindoz, ça m’ va rivnu, dji n’ ritrouve pus comint qu’ ça s’ loume co. On-î aveût stî fé glèter nosse minton èt l’abwêre valeûve bin lès stwèles èt cor au d’la.
Oyi, bon, li p’tit Mimile mon l’ Cicile, i toûrneûve autoû d’ sès quarante ans quand il aveût faît l’ grand nuk, come ça, i-gn-a nuk dès deûs losses qu’a drwèt. C’èsteût on brâve, on vaurlèt d’ cinse, on bouteû, nin pus sôléye qu’on-ôte.
I n’aveût wêre à paurt si vélo. Mins il î t’neûve ça, à si p’tite rin.ne. Èt quand l’ pèkèt lî nèyeûve l’en d’dins di s’ tièsse, il î t’neûve co pus fwârt.
Po tchanter, c’èsteût on vraî maîsse. Aus bankèts d’ mariadje, aus-ètèremints, aus batadjes à l’awous’, aus vêladjes s’il aveût d’né on côp d’ mwin. Èt co aus sopers d’ fotbal, à totes lès soces dès pècheûs, dès tchèsseûs, dès minteûs, là èwou ç’ qu’i-gn-a todi on losse ou deûs po-z-è tchanter one ou po twârtchî one fauve. On sét d’dja bin d’avance, ci qu’i vont tchanter, li pus deur, c’èst co d’ fé sèrer leû bètch au pus francs diâles.
On l’ vèyeûve voltî l’ Mimile, plin d’ feu po tchanter quand lès p’titès gotes lî brûlin’ si gasî. À chaque côp, on lî rèclameûve « Mi vêre », ostant lî fé tchanter ça qui l’ « Brabançonne » ou « L’ bia bouquèt », po s’ fé astamper totes lès djins.
Vos nè l’ conichoz nin ? Ça n’èst nin possibe di bin viker si vos nè l’ savoz nin tchanter au d’bout do bankèt. Tènoz, vos-è là dès bokèts :
I n’èst nin grand, c’è-st-on vèrkin,
Dji r’ssoûwe al linwe tot ç’ qu’i-gn-a d’dins.
Il a sièrvu po mès tayons,
I sièvrè co dès-ans au lon.
On vwèt todi quand’ dj’a bèvu.
Si dj’ so spani, on n’ mi r’waîte pus.
Quand il èst plin, i faut qu’ djè l’ vûde.
Quand il èst vûde, c’èst qui dj’ so plin !
Li d’bout do bokèt, c’è-st-à vos fé braîre èt co ; vos n’avoz nin l’ musique !
Dj’a m’ vêre dins totes lès confrérîyes
Dji tchante po tote li Walonîye
Al dêrène cinse èwou ç’ qu’il aveût bouté, li trècinserèsse lî aveût calé l’ grosse paurt di s’ pâyemint sur on lîvrèt di spaugne. Èlle aveût faît po bin fé, l’ comére. Mins lès bounès-idéyes, c’èst sovint ça qu’amin.ne lès rascrauwes. Li Mimile, c’èst lès spaugnes què l’ont pièrdu ! C’èst ça què l’a min.né pad’vant l’ curé. C’èst come ça qu’il a tot pièrdu !
One dès soûs d’on’ ovrî dèl cinse a soyu, on n’ sét comint, qu’il aveût on fameûs niyau : afîye co d’ pus d’ cinq cint mile francs, (èn eûros, fioz l’ compte vos-minme, ni m’ vinoz nin fé arèdjî avou ça, chaque côp qu’ ça tchandje, ça faît todi mwins’ di liârds qui d’vant dins nosse boûsse.)
Li Mimile, i stindeûve bin l’ brès, mins l’ comére aveût co d’pus aujîy po d’mèrer l’ bouche au laudje, èle vos-a èbalé l’afaîre sur on nuk di fustu. Li cinserèsse aveût bin vèyu qu’i-gn-aveût one saqwè là padrî, èle n’a lachî l’ livrèt qu’on côp qu’ lès bans ont stî criyîs. Là, èle ni pleûve pus r’culer, pusqui l’ Mimile aveût dins lès… Taudje one miète qui dj’ cârcule…
Li djoû di s’ banquèt, tos lès dislachîs do vijnauve, s’ont doné l’ mwin po tchèrdjî nosse Mimile à bale. Plin come one basse qu’il èsteût ! Si bin qu’ i-gn-a qu’ li qui n’a nin satchî al cwade avou l’ mariéye ci nût là !…
Li lèddimwin, foû dès gotes, il aveût riv’nu à li, disgosté di s’ djon.ne feume, rinètî d’ sès spaugnes èt dispouyî di s’vélo. Ça, i n’ l’a nin sopwârté, i polîn’ prinde tot, djèrî après s’ feume, mins s’ vélo, i n’ènn’avîn’ nin dandjî, il avin’ dès-autos : ça l’a mètu foû d’ li. Quand il a polu ratraper s’ vélo, il a faît lèver l’ guète à s’ chure-pot.
« Vos vèyoz don, lès feumes èt mi, ça n’ roterè jamaîs ! » mi d’djeûve-t-i.
Mins i s’ brouyeûve. Dîj quinze ans pus taurd, il a lachî s’ vélo adlé one vîye man.nète, li Minmin.ne què l’ miloute come on tchin pièrdu. Èle li sogne au pére dè pôce. I n’a nin on mèyeû min.nadje, i s’ètindenut bin : à paurt qu’èlle èst laîde come on pû… On’ ouy à mitan r’ssèré, èt nin todi l’ minme, on sorîre tot chaurdé come lès crin.naus d’on vî tchèstia, on filé d’ chume al cwane di s’ moustatche. Èle n’a nin d’pus d’ cougne qui deûs poumes achîdes èt on tonia come po deûs djèrmales. Èlle a dès tch’fias dèl coleûr d’one quèwe di boû, plaqués, tot craus, èle lès faît tinre au p’tit lacia qu’èle satche di sès gades. Naturélemint, èle poûwe come sès bièsses èt èle trin.ne sès chabots pace qui lès plâyes su sès bodènes l’èspêtchenut d’ lèver sès pîds. Ça n’ sèrè jamaîs l’ Castafiore, èt minme si l’ Mimile lî âreût volu payî dès-ôrerîyes, èle nè lès-âreût jamaîs soyu mète autoû d’ sès dognons rinflés pa lès bouwéyes. À paurt ça, blocnasse, one bouteûse come pâs deûs, nin tinre, èt jamaîs one gote divant dîj eûres don ! C’èst come ça qu’on d’vint cint-z-ans vî. Èt, èlle a co branmint à mostrer ! Tènoz, èlle èst quausu moyale, ça c’èst d’dja on bia costé por one comére. Li médecin dit qu’èlle a do mau po toûrner s’ linwe. - (I faurè bin qui dj’ lî faîye si pôrtraît on djoû èto à ç’tila !) - Minme sins l’ toûrner, i n’ sôrtit jamaîs d’pus d’on d’méy mot au quârt d’eûre…
Pupont d’ vélo po l’ Mimile, èle lî a payî one auto ! Sins l’ pèrmis bin seûr ! Come tos lès gamins do vijnauve, do momint qu’ sès djambes ont stî longues assez po-z-atraper lès pèdales, il a min.né on tracteûr. Mins po l’ pèrmis : bèrnike ! Studî, ça n’a jamaîs stî dins sès cwades.
Èlle èst bèle si-t-auto, deûs places come one Fèrari, dîsèl come one Mèrcédès, li twèt r’ssatchî come li cène dès présidints d’Amèrique, avou one grîje coleûr « métal usé », vraimint nin mau… tant qu’èle ni rôle nin ! Là, ça s’ brouye on laîd côp, d’abôrd li brut, on dîreût one « moto-culture », èt po l’ vitèsse èto. Li Mimile à gougnî on via qui n’ pinseûve nin qu’ l’auto avancicheûve. Il a rauyî tote li calande di plastique di d’vant d’one rouwâde. Fwârt di sès deûs mwins, li Mimile vos-a rarindjî ça à s’ maniére : papî al cole « Scotch » po-z-èbaler lès paquèts, on grand bokèt d’ bwèsse di lacia « Tètrapak » avou on costé « alu » ; i n’a pus jamaîs one gote d’aîwe qui passerè yute di d’ça !
I faît di s’ yan’ li Mimile dins s’-t-auto, avou one rodje casquète di jokè, rèfoncîye jusqu’aus pègnons d’ sès-orâyes èt one pène come on djoû d’ carinme. Li Minmin.ne vos l’a ègayolé come on spawèta, tot à carau : li tch’mîje, li culote, lès tchaussètes, li casaque, èt d’ totes lès coleûrs. Vos nè l’ sâriz dîre, lès coleûrs passenut télemint rade pace qu’èle faît todi r’boûre tot èchone : c’èst mèyeû po l’ santé èt c’èst pus aujîy come ça.
Sès pormin.nâdes, c’èst po couru pwârter on quautron d’oûs, ou do stofé dès gades di s’ comére. Insi, i s’ rècrèstéye co deûs côps, on côp po moussî au cabarèt po-z-apwârter èt on côp po s’astamper pad’vant lès pompes à bîre, èt pad’zeû tot, à s’ lèyî acrwêre qu’i siève à one saqwè : tot ç’ qu’il èst rèquis por on’ ome. S’i rintère one miète su l’ taurd, i n’ risquéye nin on côp d’ gueûye, pusqu’èle ni cause nin. S’èle lî vout fé dârmu à l’ôtél do « Cu Toûrné », c’èst co lèye qu’èst l’ pus pûnîye ! I s’è câye, li Mimile, il a télemint viké lonmint tot seû.
Ci qu’il aveût co trové d’ mèyeû adlé lèye, c’èsteût s’ tchin : l’ Bobi, on grand bastaurdé qu’aveût bin quate coleûrs. Il aveût r’pwârté su l’ Mimile lès sintimints qui l’ Minmin.ne, sins linwe, nè lî âreût soyu d’ner. Divant, quand i bouteûve adlé dès-ôtès djins, Mimile n’âreût jamaîs sondjî à s’ lôyî avou on tchin, minme s’i dârmeûve avou onk. Si s’ maîsse lî d’neûve sès quinze djoûs, ça n’ lî doneûve nin l’ drwèt d’ènn’aler avou l’ tchin à vatche, minme s’i n’aveût qui ç’ bièsse là po d’viser avou tote li djoûrnéye.
Èt l’ôte, li Bobi, i l’ cove come si ç’ sèreût s’ nîtéye. I lî faît dès ouys come Bèrnadette Soubirou à l’Avièrje, come one musulman.nète à vwèle à l’Ayatola Kin’vin.nî. Li Mimile, come tos lès Bon Diu, fout dès côps d’ pîds à s’ bièsse chaque côp qu’i lî prind one zine, l’ôte li veût co d’pus voltî èt lî rinde bon d’vwêr come si ç’ sèreût on sint. I si r’drèsse dins l’ bèle auto al place do mwârt, on direût veûy passer li rwè on vint-y-onk di julèt’. Poqwè a-t-i stî loumé Bobi ? Pace qu’on loume tos lès maules di tchin insi amon nos-ôtes, èt totes lès lèches c’èst dès « Diane », èt al vile, totes lès coméres si loumenut « Chérîye »
Li Mimile i n’ sondje à rin, bin paujêre, binauje au d’la. Li qu’aveût yeû tant malaujîy dès-ans et dès razans au lon, i vike à s’-t-auje au culot tot r’waîtant si p’tite vîye grawyî è li stûve.
Vèyoz, i n’a nin eûre nin momint po n’ pus djonde têre, pas côp, i-gn-a qu’a ratinde. Li p’tit Mimile, li, il a ratindu qu’ ça vègne tot seû, minme si ça a v’nu su l’ taurd, à l’âdje do taper djus. Mins, à i bin tûzer là, quén âdje a-t-i ?
« Dîjoz, Mèmêr, li Mimile, i l’s-a yeû ou i l’s-ârè sès swèssante cinq ans ? »
« Auwe, in ! Ç’ côp-ci, avou l’âdje do Mimile, on n’ va nin co rataquer là d’ssus. Non.na, mins taîjoz vos in, èt twè, Quèwat’, djoûwe one caute ou on fagot, mins djoûwe ! »