L’ARPAGON EIÉT L’CHAFTI.
In Arpagon d’meurét d’lé l’Châfti Jâque Criart.
Eiét du joû au niu, i n’fiét q’rouv’lé sés liards !
Mai i n’aurét né su petté in somme,
Jâque, au contrère, c’estét in homme,
Qui doirmét, qui chantét, à désquetté s’gohî ;
Et quand l’amassoû v’lét soki,
I vo l’rinvèyet copu rade,
In foutant iune dé sés roulades !
« Pouquoé d’set ti l’avare, s’qu’on n’vind né au mârchi
« Du someye, comme jè vind, les woiyins d’més pachis ? »
I fai v’ni Jaque, dédain s’mogeonne,
Avét s’sindrin et s’crasse maronne.
— « Choutèt Jaque, su enne an, quoé pôulez bin gagni ?
Disti l’avare au noère châfti ;
Quî li respond : « I n’a né co stichi dain m’tiesse,
« D’carculé ça su du papi !
« Jé n’intasse rin dain m’ dresse,
« Jé su seulemint binauche qu’à l’fin,
« Tous les joûs j’ai ieu m’bouquet d’poin !
— « Et bin par joû ? disti l’crézus, in clignant s’nouye :
— « Quéque foés pu, quéque foés moinse, disti Jâque in riant !
« Mai d’sét q’là d’dain s’qui nô z’inbrouye :
« C’est qui nô faut chure in priant,
« Les Paques, les dimègnes et les fiesses,
« Et qui no faut d’allé à messe,
« Sous poène de iesse dannét !
« Disti l’curét.
« Pou l’moés d’Mârie, faut payi leû guirlandes,
« A l’zinterremints, faut d’allé à l’offrande.
« A l’églige c’est toudi payi :
V’ni au monde, fai ses pâques, s’marrié, eiét mori !
L’ritchard riét comme enne grosse biesse !
— I li dit : « Aujourd’hu, jé vout q’tu feye ell’fiesse :
« Jé m’va t’donné n’saquoé :
« Vasé quaî in bouli, du bure et du stoffét.
« Tint v’la cint francs ! pôte les rade dain t’tiroère !
« Pou t’in chiervi, quand tu d’auras dangi, »
Jâque prin les liards, i s’eva boère
Enne pinte au cabaret, i raconte ess’n’histoère,
Et pu dain s’cauve, i va radmoin fouyi,
Pou interré ses liards, qui li fieint tant d’plaigi !
In interrant sés liards, il interrét s’bonheûre !
I n’p’lét pu doirmi n’démi heûre !
I n’minget pu ! i n’chantét pu !
I d’vénét set’che comme enne esquette !
Il avét peu d’iesse rattindu,
Inpoésonnét ! strannét, ou p’tette :
Qu’on l’troufe dain s’lit asazinét !
Par niû, si l’chat fiét chaire, ell’coquemoire ou bin n’tasse,
I sautlét su s’tranchét !
Pou desqueude ell’cârcasse,
Au preumi qu’aurèt v’lu woéti d’li printe sés liards !
I l’liaurét rade moustrèt : quoé s’qué çaî d’Jâque Criart.
— Oyi mai de c’train là, il a rade ieu sti lasse !
I prin les liards, i part, vint dire à l’arpagon :
« Rindemme emme foîm, emme somme, eiét m’voéx d’basse,
« Eiét r’perdét vô pîcayions. »
Stichét vous bin tertous dain l’tiesse :
Qué l’contintemint, passe ell’richesse.