L’BAUDET MAU CONTINT.
L’Baudet d’in j’ardigni d’avét conte ell’Bon Diœu,
Pasqu’on l’féyét r’lévé bin d’vant qué l’solia n’luge !
« Quand les coqs, li d’sét ti, chante nu à l’since du Leû,
« Jé sû su pid eiét plain d’ruge !
« Et pou quoé fai ? pou moénné d’zindifes au mârchi !
« Là ti né n’belle saquoé, pou m’desringi si timpe ! »
L’Bon Diœu, inmarvoyi, dé l’vire si desbauchi,
Lévoye d’lé in aute moèse ! çai s’qui niavét d’pû simpe.
C’estét d’lé in tanneû, in’poulét miœu choési,
V’là l’Baudét dain l’tannerie, comme l’effant dé l’mogeonne,
I rintrét dain s’néstaule, pou li d’allé couchi,
Et il estét r’nettiî, vraimint comme enne personne.
I n’féyét presqué rîn, q’quand l’bouchî, pou l’tannerie
Toquét n’vat’che ou in via,
I d’allét radmoin r’quai lés pias,
Et il estét moinnét pa l’britte, sain zéscorîe.
Comme lés pîa estint p’santes, eiét qu’elles s’intint m’wais,
A l’fin i barbotét, quand i d’allét lés r’quai :
« J’dai bin assét, d’sét ti, d’travayi dain n’tannerie,
« Et j’su bin anoyeux d’avoét l’lii l’jârdignî !
« S’il avét s’tiesse tournée, jé l’liapougnét habie
« In navia ou n’pétrâle ! pa d’vant ou bin padrî :
« Drocî si j’ai n’saquoé, c’t’enne brogne ou in coup d’pid ! »
L’bon Diœu l’lintint co brère,
Et pou rad’moin l’fai tère,
I l’lévoye ell’ledmoin d’lé Louis Caracot,
Qui vindét du cherbon, dés baiches, eiét du bot :
Quand il a sti drolà, ça sti enne aute histoère ;
Comme Caracot vindét brammin,
I cherriét d’l’houye su s’dos, du matin jusqu’au soère,
Et i d’a bin rade ieu s’contint !
I r’comince co à brère !
Mai l’bon Diœu co pu rade,
Li respond in colère :
« Halté là camarade !
« Coéresse qué t’n’à qu’à brère, pou qué j’vienne t’apougi ?
« Bin tu t’trompes brammin sése emm’fi !
« T’n’est qu’in vrai prope à rin, in vi tiestu d’Baudét,
« Et t’est pu malaugile, et pu rouyant qu’in roé !
« Coèresse qué t’est tout seû, qu’est malhûreux su terre ?
« T’est s’t’in malin va tî ! pôrte tu bin et arvoère. »
Il avét bin raiso ! à t’nouye, oh ! ti Gustin ?
Tous les geins sont ainsi, i n’sont jamai contints !
On pinse toudi qu’on z’est pu fayet q’tous lés autes,
Nô r’clamons tous les joûs l’bon Diœu et sés apôtes,
Et si no zévoyét s’qué nô v’nons li r’clamé,
Jé wage qui niaurét co, qui dirint… l’l’imbété.