L’GÉRAU COUVRU DÉS PLUMES DU PAN.
In joü in Pan, s’d’esplomèt pa t’tavau,
Sés plumes cheye nu, dain lés grawes d’în Gérau !
Qui s’fout radmoin dain l’tiesse,
D’lés z’acclapé su s’dos, pa d’larpoét ét d’l’ampoèsse !
S’coéyant bîa, i séva rade au mitant dés Pans,
Pou fai dé s’geüe et du ronflant !
Il a bia châlé d’cresse !
On l’lerconnet à s’qeuwe ! on li fai foute ell’camp,
A grands coups d’bétche, évoye, comme in ch’napan !
I cheye nu si bin su s’tignasse,
Qui li désplome nu s’paufe cârcasse,
T’taussi chennue qué n’vie Agasse !
I s’éva pou s’muchi au mitant dés Géraus,
Pou sés poènes à coups d’betche, qui l’leye nu su l’carreau.
Li moustrant qui n’fau né : petté pu haut qué s’trau !
Si n’saqui leye padrî, s’pârti, s’raing, ou bin s’classe,
Eiét si r’tourne casaque coèyant gangni n’saquoè,
I blaque, pou s’nou pârti, à taure et à traviét,
Qui n’fai né attintion, si braye ou si jacasse,
C’est s’tin faux frère ! on li chai su l’tignasse !
Mai quand i r’vint d’lé l’zautes, d’ain s’manche pou lés ravoét,
On l’cache à l’huche ! in li foutant n’rapasse.