IKid’napadje
« Â ! Vo-l’-la ! »
Djiblou. Yinte li tunèl èt l’ rond-pwint, li break a taurdjî tot frin.nant à rauyî sès bindeladjes.
« S’i vos plaît bin, m’ crapôde ! »
Dès blondès longuès trèsses solèvéyes pa l’ bîje, chapéyes di d’zo on blanc bobo. Rén qu’ deûs féns-ouys au d’zeû d’one sipèsse èchêrpe nukîye pa lès rafurlantès mwins d’one man.
« Oyi, Madame ? »
Li feume padrî s’ volant, à mostré dès bwèsses di cârton èt dès-atricayes su lès bankètes di d’drî.
« Faut qui dj’ vôye min.ner cès cacayes là po l’ Noyé dès-èfants d’one sicole al rouwe di Mazi. Mins dji n’ so nin d’ Djiblou, èt dji so pièrdouwe. Vos n’ mi sâriz mostrer l’ vôye ? »
Céline, 13 ans, a radjusté lès-aburtales di s’ satch à dos, èt v’nu pus près dèl bôrd dèl vôye. Quatre eûres èt d’méye. Li brune tchaîyeût d’dja. Après si scole èle diveût co r’passer pa mon l’apoticaîre, i lî faureût co bourer pus rade po rabroker à s’ maujone èt n’ nin mète sès djins dins lès transes.
« Vos n’èstoz nin lon èri, Madame, dji vos l’ vou bin dîre mins dji n’ sé comint m’î prinde… Lès-èfants vont-èsse binaujes po lès-atricayes… I vos faut prinde li vôye di Nameur, vélà à drwète èt adon pwis… rid’chinde come po-z-aler è l’ vile, rimonter jusqu’al rond pwint èt ratraper l’ brisé d’ Mazi… »
« Dji n’î comprind rén, brisé d’ Mazi, c’èst come si vos m’ causeriz è Nameurwès ! Èt avou mès vîs-ouys ! Alez, on faît martchî, vos montoz dins m’-n-auto, vos m’ mostroz l’ vôye dèl sicole. Dj’î va rademint pwârter lès-atricayes èt après dji v’ ramin.ne fén rwèd à vosse maujone. Èt dji v’ dôrè co l’ grand Marsulapi qu’èst dins m’ cofe. Vos-èstoz one miète trop grande po ça, mins vos-avoz seûr one pitite soû ou on p’tit frére. Insi, il ârè one bèle bistoke èto po s’ Noyé ! »
Céline s’a r’ssatchî d’ l’auto. Al sicole come à s’ maujone, on lî a bin èspliqué qu’èle ni dwèt nin griper dins l’auto d’on’ ome qu’èle ni conèt nén. On lî a assez rèpèté ! Qu’i-gn-a dès baligands qui s’ mosturenut pâr trop djintis, qui donenut dès boubounes, qui savenut comint s’î prinde avou lès-èfants. Èt après chî samin.nes, on r’trove li cwârp di l’èfant tot comoudri l’ long d’one chavéye ou à mitan ètèré dins on bwès. Mins, poqwè awè peû d’one vîye feume, tote ratchitchîye pa d’zo sès blancs tch’vias, avou sès grossès lunètes di skâye èt s’ pëtote fine rodje come on cloun’ ?
Céline agneûve su l’ pwinte di sès wants tote sondjaude :
La waîte, faut co bin qu’ ça tchaiye sur mi !
« Dji n’ pou nin monter, Madame. Nosse man m’ l’a disfindu ! »
Li vîye feume lî a stindu saquants mini Bart Simpson djane poyon.
« C’èst dès cias qu’ dj’a d’ trop. I sont por vos, vos pouroz fé l’distribucion dins vosse sicole. I-gn-a dès djins qui m’ont d’dja mostré l’ vôye deûs côps. Mins dji n’ so nin maline assez po tirer m’ plan tote seûle ! Alez, s’i vos plaît, montoz avou mi ! Dji n’a pus wêre di timps ! Mès-èfants èt mès p’tits-èfants m’ ratindenut po soper ! »
Céline balzineûve d’on pîd d’ssu l’ôte. Qwè fé ? nin chouter ç’ qui s’ man lî aveût dit ? Jamaîs ! Oyi, mins c’èsteût po l’ bin dès-èfants. Dès-èfants d’one sicole di p’tits malèreûs. Èt adon pwis, li régue, c’èsteût po lès-omes, nin por one vîye mémé, tinrule come li mène…
« C’èst bon… Mins après vos m’ min.neroz amon l’apoticaire ? Dji dwè rabroker à nosse maujone divant cénq eûres, ôdoubin, dji m’ va fé touwer ! »
Ça bauchèle, ti n’ l’âreûs mia soyu dîre, a-t-i sondjî dins s’ tièsse.
« Top ! Come on-z-a dit ! Montoz padrî. Atincion aus-atricayes. Dji n’ voureû nin qu’ vos m’ lès spîyerîz ! »
« Vos p’loz r’ssatchî vosse bonèt, i n’ plout nin dins l’auto ! »
D’on côp d’ tièsse, lès blondès mètches s’ont spaurdu su lès deûs spales.
Bèle, bèle au d’là : sondja-t-i…
Nén one auto po s’aporçure dèl sin.ne. Nin one djin. Il èstin’ bin trop prins pa lès condjîs d’ Noyé, èt lès sclats dès lumîres dèl vile.
T’t-ossi èdwârmant qui l’ wate d’ètêr qui spotcheûve li nez da Céline po lî fé piède si tièsse…
Il a rauyî l’ blanke pèruque djus di s’ tièsse. L’auto s’a rènondé dins l’ daladje…