IVL’acsidint
Li 305 a frin.né à mwârt tot ralumant sès bindeladjes, chover l’ bèton, divant d’ taurdjî.
« Bon Diè Silvin, c’èst qwè ça ! »
Tot d’on côp, Primo aveût atrapé dèl souweû, fén frèch di sèrâde, pus one gote di ratchon. I tron.neût come one fouye di djote au vint. Si mwin à trové l’ comande dès lumerotes maugré l’ triyanemint. Il aveût sès-ouys su l’ waîte-padrî.
« Dji n’è sé rén ! On-a…areût dit… one bièsse ! »
Silvin l’a apicî pa si spale.
« Non.na, nin one bièsse ! Ça a djondu l’ fâre, li capot, l’ pare-brîje ! One bièsse, èlle areût stî chovéye, bakéye pa pa d’avant. On l’âreût yeû spotchî ! Rèscule, rèscule ! »
Primo n’ saveût r’drovu sès dints. Pus mwârt qui vike – souwant à gotes, sès tch’vias drèssîs su s’ tièsse, si cèrvia lî acèrtineûve ci qu’i n’ voleûve an’mète : il avîn’ djondu one saqwè d’ drèssî, d’ quausu deûs mètes di long, on paquèt d’ tchau, on paquèt gwârdji d’ song. Il avîn’ passé au d’ truviès dèl cwârp d’one djin, è plin.ne nût, dins l’ vûde, au d’zo dès zûnantès-éles dès molins à vint.
On nwêr moncia, rasta, s’ mostreûve dins lès lumerotes di d’ dri.
« Va… rote veûy ! » A-t-i criyî Silvin.
« Faut tèlèfoner au 112 ! Aus blouws ! »
« Va d’abôrd veûy ! Dispêtche tu, puttana ! »
Silvin à choûté. Pont d’ brût à paurt lès djèmichemints dès-èyoliènes. Li bîje sofleûve dès-awîyes di glaces. Padrî, su l’ bèton, il advineût bin qu’ c’èsteût on’ ome, rafurlé dins sès nwêrs moussemints. Si pane di vêre rilûjante, lètchîye pa lès rodjès lumerotes di d’drî.
Sès lèpes rissèréyes, Silvin a basculé l’ cwârp po l’ rimète su s’ dos. I n’aveût pupont d’ visadje, rén qu’ do song. Sès-ouys rawaîtin’ li vûde, sès djambes crwèjeléyes à n’ nin crwêre !
« Vén… Primo ! Vén ! Dj’a è l’idéye qu’il èst mwârt ! Il èst mwârt puttana ! »
Primo a r’ssèré lès lumîres. C’è-st-èwarant come lès-idéyes qu’on s’è faît, ripudenut rademint leûs vraîyès places dins vosse tièsse po-z-è fé ç’ qu’on pinse yèsse di bon. Il a apicî s’ lampe di potche èt s’ lancî su l’ bèton. Si dwègt a couru su l’ gorléye, po sinte si l’ keûr bateût co.
« Mèrde ! Ci n’èst… Ci n’èst nin possube ! »
« Primo… faut… lès blouws… »
Primo a co aspouyî su l’ song qui monte au cèrvia, su l’ rodje vin.ne dèl pougnète, plaquer s’-t-orâye su li stoumac’. Pus rin, pus nin on brût à paurt lès cias què lî ènondîn’ si tièsse : lès ûlauds èt l’ clitchîs dès fiêrs qui s’ rissèrenut su sès pougnèts.
Su l’ côp, i s’a rastampé. Autoû dès-èyoliènes, lès cayutes qu’avîn’ sièrvu po lès drèssî : aband’néyes. Pus lon, l’ vûde, fén nwêr, li stwèlî bogué d’ nûléyes. Li nût, fine nwêre. Pèrson.ne po n’ rén veûy. Jusse, aspouyî su l’ pèdale, li pus fwârt possube, po rovî l’ tchôkemârt.
« Ratind ! Faut pèser ç’ qu’i nos d’vans fé, çi qu’èst possube dè fé ! »
« Ci qu’ nos d’vans fé ? Cit-ome là èst mwârt ! Nos d’vans advèrti lès blouws ! Done mi t’ gsm. »
Primo a stî ramasser on satch di spôrt à deûs mètes dèl dispouye. Ci qu’ l’aveût à dîre à moru su sès lèpes quand i l’s-a drovu…
Dès biyèts, One ramonceléye di biyèts, dès biyèts d’ cénq, di dîj, di véngt, di cénquante, di cint, tos dès cias qu’avîn’ dèdja sièrvu.
Ci côp ci, i-gn-a pus à ratinde. Si cèrvia lî èvôye di l’élèctricité pa sès niêrs djusqu’a chôpyî lès d’bouts d’ sès dwègts : li pôce aspouye su l’ boton dèl lampe.
« Poqwè as’ distindu ? Ralume mi ç’ foutuwe l’ lampe di potche là ! »
« Dins… l’ satch ! I-gn-a on coutia d’ boutchî èt… »
« Qwè ! »
« One ramonceléye di liârds. I-gn-a bin po viker djusqu’à Matisalé èt co pus lon ! »
Ça roteûve trop rade po Silvin. I n’ saveût pus qwè !
« On rind l’ satch aus blouws… I faut qu’i vègnenuche… »
« Rastrind, tûze on pau ! On s’a èmantchî chake quate chaléyès bîres ! On rôleûve al volë-spîd ! Lès lumerotes sèréyes ! Quéquefîye à cint cénquante ! Waîte lès rotes dès frins, lès flics comprudront rade ! Mi frére boute al police, dji sé bin comint ç’ qu’i tûze, djè l’ conè, mèrde ! On va fini nos djoûs al piole s’ont lès uke ! Ti comprinds ?
« On… n’ pout nin pèter èvôye ! Dji n’ vou nin, ti m’ètinds ! »
On trau di r’chonance : minme grandeû, mins sèptante kilos d’ssus pîds po Primo, po s’ pwèd d’ satch tot mièrnu po Silvin. Èt c’èst li p’tit crèkion qu’aleûve cocheûre li gros.
« Ci n’èst nin twè qui min.neûve ! Adon, on va dîre qui c’èst twè qu’èsteût padrî l’ volant ! Di sqwêre ? »
Près’ à s’apougnî tos lès deûs… lès niêrs conte li fwace. Silvin aveût apicî l’ gsm èt later Primo lès quate fiêrs è l’aîr…
« Silvin, dji tè l’ dimande à d’gnos ! Ni lès uke nin ! I nos vont rèssèrer ! »
Fé one saqwè ! Sauver s’ pia ! Par bèle ou par laîde ! Primo s’a rastampé, chin.ner viè l’auto costé dèl place do mwârt, rissèrer l’ pôrtiére, riténre si soflèt èt rilater s’ tièsse dissus l’ pâre-brîje. Li song picheûve qui Silvin n’aveût nin co faît one ascauchîye.
« Ti d’véns sot ? »
Primo aspouyeût d’dja avou s’ mouchwè su s’ front.
« Ça faît mau ! Aye… T’as raspouyî su l’ frin come on sot. Dj’ a pèté m’ tièsse dissus l’ carau di m’ costé. S’i vègnenut i dîront qu’ c’èsteût twè qui min.neûve. »
« Baligand ! »
Primo a rauyî l’ tèlèfone foû d’ sès mwins.
« Dji n’ cache qu’à nos chaper, ti n’ comprinds nin ? I-gn-a pèrson.ne què l’ sét qui n’s-èstans à trinte kilomètes di nosse maujone. D’abitude nos djouwans au majong dissus l’ twèle. Èt là, nos-avans machuré one divanture di fabrique, nin lon di d’ci. I n’ rimètront jamaîs lès deûs-istwêres èchone. Nos… nos ramassans lès liârds èt on s’ faît quite do mwârt ! »
« Dji n’ sârè jamaîs… T’ès malade, on vraî malade ! »
« Alez ! Dispètche tu ! Done mu on côp d’ mwin po l’ pwârter. Sondje à t’ comére, à t’ crapôde ! Èle ti ratindenut. Tè lès pous co r’veûy sins-èsse rèssèré po ça ! Après i sèrè trop taurd ! »
Dès vûsions d’infiêr po Silvin. Dès-omes moussî à prijnîs, dès tchin.nes à leûs pîds. Dès côs avou do fi d’arca tot-autoû. Dès prijnîs tot mièrnus pa d’zo l’ drache.
Non.na ! Potchî foû do tchôkemwârt au pus rwèd. Ènn’aler, r’ssèrer l’ nwêr padrî s’ dos.
« Dji t’ vou bin choûter, mins dji n’ vou nin dèl song d’on mwârt dissus mès mwins… Nos l’ lèyans véci… »
« Â oy’ ? Èt i veûront tès dwègts su sès moussemints, t’î as sondjî ? Si t’as pièrdu on pwèl, i tè l’ côperont à bokèts po sayî di t’ riconèche. Pont d’ dispouye, i-gn-a rén à cachî. Nos n’avans qu’a l’ mète au rcwè.
Silvin toûrneûve avou s’ dwègt dins s’ rossète caume. One tourpène à tch’vias !
« Trinte kilomètes avou on mwârt dins l’ cofe, mins t’ès malade ! Nos n’avans qu’à l’ baker dins l’ètang dèl Baron à Grand-Leez. »
« Non.na ! Pont d’ risse. S’i-gn-a one saquî qui va al police po dîre qu’i n’a pus rabroké à s’ maujone, i vont fougneter dins totes lès-aîwes. I l’ ritroveront èt nos sèrans r’faît po d’ bon ! Choûte mi bin, li vôye po-z-èraler, nos l’ conèchans, nos l’avans faît dès-anéyes au lon. On n’î a jamaîs vèyu on blouw tot-z-è ralant. Nos passerans pa totes lès p’titès vôyes, pa lès vôyes di campagne s’i faut. On s’ faît quite dèl dispouye… èt on ramasse lès caurs ! Sondje-z-î ! Sondje on pau come nos pôrans viker avou one parèye cassète ! C’èst l’ Bon Diu qui nos l’ done ! Auwe lès couratrîyes po trover d’ l’ovradje ! Lès factures à payî, lès strindadjes di cingue ! Sondje à ça ! »
Li vint d’ bîje ècwadeleûve Silvin come dèl drogue. Li moncia di liârds lî fieût toûrner s’ tièsse à passète. Poqwè si d’vu vinde lî minme ? Lès flics, zèls, i n’ont pont d’âme è leû panse. Primo avot tot bon, prinde si planète come èle tchaît, èt lèyi couru…
Ni pus sondjî à rin. Fé por on mia, por zèls ! Pèter èvôye !
« On n’ sâreut fé ôtrumint… Faut qui dj’ sondje à mès djins qui dj’ veû si tant voltî. Dji n’ vou nin veûy mi fèye crèche au d’ truviè d’one pwate di prîjon ! »
« Dispêtchans n’ d’abôrd ! »
Primo s’a clincî su l’ dispouye :
« Li song à pichî su s’ visadje. On lî va mète on satchot d’ plastique dissus s’ tièsse. »
L’acsidint toûrneûve à tuwadje. Lès deûs maniganceûs ont ètassî l’ cwârp èt lès liârds dins l’ cofe.
Todi person.ne. Pont d’auto. Pont d’ lumîre. On brût à frumjî lès-orâyes da Silvin.
« T’as ètindu ? »
« Qwè ? »
Silvin à mostré one cayute au pîd d’ l’èyoliène.
« I m’ chone awè ètindu come on brût d’ tole, ça… ça v’neûve di d’là. »
Primo à lancî s’ lampe su lès man.nèts caraus au d’zeû dès cènés, su l’uch qu’a r’dagnî avou l’ bîje.
« C’èst po rîre dandjureû ! C’è-st-aband’né, près’ à tchaîr ! T’ârès ètindu l’ brût dèl vint dins lès tournikèts. Ti t’è faîs one pasquéye avou rén ! Dispêtche tu, mousse è l’auto ! Dj’arive !
Primo à cotoûrné tot-autoû. Il a ramassé dès bokèts d’ fâre, richoûrbu do song su l’ pavéye avou one vîye loque, razouyî l’ capot cotwârdu, divant d’ s’achîre padrî l’ volant.
Li nût à avalé l’auto…
Primo a cachî après sès mots on momint po dîre :
« Onawêre, si dj’ t’a dit qui dj’ racontereû aus blouws qui c’èsteût twè qui min.neûve… C’èsteût po t’èspêtchî d’ fé one bièstrîye èt spaurgnî t’ famile… »
Sins motî, Silvin à toûrné s’ tièsse su l’ costé, i sèreûve dins s’ mwin one mèdâye avou l’ foto di s’ feume.
I fieûve fén nwêr, èt pont d’ tèmwin po veûy l’abôminâbe…