XV
L’ètèremint dèl magot
Lès djoûs ralonguichenut d’dja d’vant l’ Noyé, mins l’ tièsse do tèri grèteût lès nûléyes dins l’ nwèreû. Li tèri dès Coloûtes, dès miyons d’ kilos d’ crénces di tchèrbon, di têre, machîs avou l’ souweû dès mineûs. Si grand-pére lî aveût raconté qu’il l’aveût vèyu crèche dins lès-anéyes d’après l’ guêre di quatôze. Silvin î gripeût d’dja po djouwer èt machurer sès d’gnos quand il aveût co dès coûtès culotes. C’èst dîre come i l’ conècheut bin ! Primo a catchî s’-t-auto astok d’one cârcasse di fiêr aband’néye, tote èrènîye. « Lès tèris, t’as fait l’ bon tchwès ! » « À paurt lès tchèsseûs al saîson, èt lès gamins timps dès condjîs, tote li place a stî prîje pas lès bouchons di spines èt lès rampioules. I n’a pont d’ mèyeûse catchète po nosse dimwin… T’as prins one chupe, on locèt po l’ètèrer ? » « Come po-z-ètèrer l’ panse d’on tchènon.ne ! »
Primo a drovu l’ cofe di l’auto : dins l’ fond, dès cwades, dès couviètes, dès-ostèyes, dès tchinistrîyes, èt au mitan, one novèle cassète avou on loquèt.
« Ti vous controler ? » qu’il a d’mandé Primo avou on capon côp d’ouy.
« Laî m’ lès raviser on daîrin côp, Ti sâreûs come djè lès veû d’dja voltî cès bias biyèts là ! »
Primo a sèré l’ clé dins l’ loquèt, drovu l’ bwèsse di Pandore.
« Lès d’vu ètèrer, c’èst come si dj’ dwèreû cauveler m’ fosse. On prind saquants biyèts ? Chakonk po cénq cints eûros ? Ça n’ si veûrè nin dins l’ moncia ? Po passer l’ novèl an ? »
« Rén à fé ! C’èst come si t’ sèreûs è paradis, t’as vèyu èwou qu’ ça l’a min.né, noste Adam ? »
« Auwe ! Taudje one miète avou tès prétches à-z-ècrauchî lès pourcias. C’èst da twè ostant qu’ da mi. Si dj’a ausse di m’ ènnè sièrvu, dji… »
« On n’î boudje nén, qu’ dj’a dit ! Come djè l’ veû, t’as bin sopwârté l’ bucadje d’ayîr ! »
« Èt ç’ coutia là, c’èst qwè ?, Tè l’ laîs là ? »
« Nos dîrans qu’ c’èst lî qui va waitî à nosse manôye ! »
Silvin a aspalé lès-ostèyes. Primo a apicî l’ magot èt r’ssèrer doucètemint l’ cofe po n’ pont fé d’ brût. I s’ont pièrdu dins l’ brune. Silvin a taurdjî, stantche, po rawè s’-t-alin.ne èt choûter. Il lî choneûve ètinde li scrèpadje dès pioches dès mineûs dins lès vwin.nes à gayètes. Lès-âmes dès nwêrès gueûyes continoûwin’ leûs-ovradjes dispôy todi…
« Vélà, à saquants mètes di d’ci, i-gn-a mwins’ d’ aube, nos-alans p’lu catchî l’ valîje paujêremint. »
« Dj’a dès vûsions. Dj’a viké à nin co on kilomète, èt dji n’a jamaîs mètu on pîd véci ! »
« Asteûre qui nos vikans à Gobtindje, dji n’î vén pus, mins dins l’ timps, di l’èsté, quén plaîjî d’ griper jusqu’au d’zeû : rawaîtî l’ solia, one grosse boule di feu qui s’ va coutchî ! Adon, ti prinds bin l’ mèsure di ç’ qui nos vîs parints on d’vu sopwârter dins l’ fond dès pus’. »
« Twè, t’âreûs d’vu djouwer dins « Lès feux de l’amour » Bon, on s’î mèt ? Mi famile mi ratind po l’ Noyé. »
Li dagne, èdjaléye su s’ copète, ni s’a nin rindu aujîyemint aus-agnûres dèl locèt. Mins on côp l’ crosse sicrèpéye, lès pioches ont rade yeû arindjî on nid po l’ fameûs niyaud.
« C’èst ç’ têre là qu’a èssèvli nos vîs parints qui va fé raviker sès p’tits-èfants, valèt ! Amèn’. On ristope. »
« Vola, co one paletéye, on tasse avou nos pîds, dès cochètes pa pa d’zeû, l’ djaléye frè l’ rèsse. On n’ veûrè pus l’ plâye ! »
« Asteûre, dispêtchans n’. Ti feume si va doter d’one saqwè ! »
Sylvin n’ crankieûve nén, i fieût dès djeûs avou s’ lampe autou dèl fosse.
« On n’èst nin à pîces… Ti n’ mi dones nin l’ clé dèl lokèt ? T’ènn’as seûr on dobe, adon ti m’ donereûs bin ç’tèlci. Chake si clé, ci n’èst qu’ di jusse… »
D’one clé d’ brès, Primo, lî a calé s’ tièsse.
« Sil ! Mi soçon Sil ! I-gn-a qu’ mi po t’ sipaurgnî dès mèyins. Si dj’ nè l’ freû nén, si dji t’ laîreû l’ clé, dimwin ti véns pougnî dins l’ magot ! Li lèd’dimwin, c’èst t’ feume què l’ sét, èt co l’ vijnauve, èt po l’ fén dèl samin.ne, li rwè vénrè paurtî avou twè, pace qu’i l’ sârè èto ! Ti m’ prinds por on bardouchî, on cwagnoule ? I sèreût timps d’ waîtî à ç’ qui t’ faîs ! »
Silvin s’a rastampé èt solèver Primo d’ têre.
« Dj’ènn’a m’ soû d’yèsse rawaîtî por on maule aîr. Si dji t’ di… »
« Bon Diu, lache mi ! Ti n’ sins nin tès fwaces ! »
Silvin aveût apougnî Primo qu’i spotcheût su si stoumac’.
« Li clé qu’ dj’a dit ! One clé po chake ! »
« Pôve… Pôve bwârgnasse… C’èst come ça qu’ ti m’ dis mèrci… À mi, on soçon qui vént d’arindjî lès bidons po qu’ t’auyes do tchaufadje ? »
« Ça t’arindje èto, in ! Ti t’ mèts au r’cwè dès dotances. »
Primo s’a r’trové stauré dins on mièrnu bouchon di spines.
Silvin a rataqué : « Dj’a paurtadjî t’-y-acsidint, ti nos poureûs mète su l’ minme pîd ! »
Primo a disténdu s’ lampe. Il èsteût astamburné come one posture di pîre : sès-ouys pètin’ dès flames.
« Tén… Vo-l’-là… Prind l’, ci puttana d’ clé là… Mins waîte à ti, si t’ènnè prinds on’ eûro foû, divant qu’on l’ dècide èchone… »
« Sinon, qwè ?… »
Silvin a apicî l’ clé èt toûrner s’ tchaur sins ratinde. Si song boleûve dins sès vwin.nes. Primo aveût one tièsse di diâle. Di d’qwè èsteût-i capâbe, li, qui s’aveût d’dja faît pèter l’ tièsse su l’ pâre-brîje…
Il ont rabroké sins motî. Jusse dès mwaîjès-ouyâdes èt dès ravalés ratchons.
Primo à ramin.né Silvin pa d’vant s’ maujone. On côp tot seû, il a drovu l’ bwèsse aus wants, po-z-î prinde li clé d’ l’uch d’intréye qu’il aveût zwèpé èt l’ mète dins s’ potche…