XXIX
Rossète èt Jules Mwasse
« Si l’ comissaîre vout s’ forbouter à promète, nos n’avans pus qu’one nût èt on djoû d’vant nos, don, Mwasse ! »
« Djè l’ sé bin, lieût’nant, ça m’ faît dèl pwin.ne por li. Mins dji pinse bin qu’ nos-î ariv’rans. Come djè l’ sin, ça va aler pus rade. Dins tos lès cas, i nos d’more tote li nût, po fé lès comptes dès novèles qui tchaîront, èt qu’ nos spèpiyerans èchone. »
« Bon, Qu’avans n’ dipus qui d’mande co rèsponse ?
« Li bwèsse da Alècsandre : èlle a stî èvôyîye au labo. I boutenut d’ssu sins r’lache ; I nos dîrons qwè l’ pus rade possube. »
« Li comissaîre aveût èvôyî lès-omes fé tos lès médecéns. Qwè ç’ qui ça à d’né ? »
« Rén : i-gn-a nin onk qu’a one novèle grète à s’-t-auto. Dji pinse qui di ç costé là, on s’a brouyî on fameûs côps ! »
« Nos-avans d’vu piède li filé quéque pârt dins nos r’qwêradjes, ci n’èst nin possube, Faut rataquer à l’èdaume, à l’acsidint. »
« Avans n’ ritrové lès tagueûs ?
« Rén, s’il ont lès liârds, il ont l’ touweû à leûs trosses. Dji n’ voreû yèsse à leû place ! »
« Li touweû ? »
« Au cu dès deûs-ôtes, Mins èwou cachî ?
« Dècrampes ?
« Co rén, On-a ralaurdjî l’ rèyon dès r’qwêradjes. »
« C’è-st-à s’dimander s’i-gn-a nin on sint po lès touweûs ! »
« I nos faurè bin prinde pacyince, èt ratinde qui lès rapôrts dèl labo toumenuche. »
« Lieût’nant, vos-avoz mètu on’ ome di piquèt po guignî l’ maujone da Jéjé ? »
« C’èst faît. I s’a mètu à one cénqwantin.ne di mètes, au fond d’on pachi, padrî one âye, tot jusse pad’vant l’ maujone. S’i-gn-a on tchèt qui r’mouwe si quèwe, i nos l’ dîrè. »
« Avoz yeû l’ timps d’ razouyî lès contrats qui li psi nos-a d’né ? »
« Oyi, dj’a faît dès r’qwêradjes dissus m’-n-indjole èt amon l’ notaîre Prousfeume. Si clèrc, Lucyin, è-st-onk di mès vîs soçons. I s’ sovént bin d’ l’afaîre, mins i lî faut one miète dipus d’ timps. I n’ vout nin raconter dès craques. Dins tos lès cas, i m’ tèlèfonerè, i m’ l’a promètu, minme dèl nût, s’i trove one saqwè. »
« I-gn-a pus qu’a ratinde d’abôrd… Dji so su dès tchôdès bréjes… »