XXV
Jéjé
Li djoû qui l’ fondrîye Mélote — Oyi, c’èst bin citèlla qu’aveût stî taguéye — aveût r’clôyu sès pwates po d’ bon, Jéjé s’aveût cor on côp r’trové avou rén. Li prumî côp, il èsteût à s’compte, su on garadje. Mins s’ comére, naujîye dè l’ veûy rimoussî totes lès vièspréyes, nwêr come on craya, aveût pèté èvôye avou on djouweû d’armonica, èt avou tos lès meûbes. I s’aveût r’trové su s’ cu, èt dispus don, lès-uchîs nè l’ lachin’ pus ! Il aveût trové on’ arindjemint avou lès transpôrts Prison. Il î bouteûve à mitan, comme ça, si feume èt lès-uchîs, n’ savin’ rén lî prinde di si p’tite quénzin.ne. Il èsteût conu d’ laudje èt d’ lon come onk dès mèyeûs mécaniciens, èt sièrvauve avou tot l’monde. I-gn-aveût todi one chîléye d’autos pa d’vant s’ maujone. On s’dimandeûve todi bin poqwè !…
Èt vola qu’ lès Prison causin’ di sèrer botique. I n’avîn’ qu’one seûle pratique : li fonderîye. À qwè bon co s’ casser lès rins, zèls qu’avîn’ dèdja leû pwin cût rén qu’avou leûs-èritances. Ça n’a nin paupî, il ont lèvé l’ guète èto.
Jéjé aveût rade yeû r’trové d’ l’ovradje adlé on’ ôte transporteû, aus minmès condicions… Èt, i-gn-aveût todi d’pus d’autos pa d’vant s’ maujone…
Èt vola qu’on boucheûve à s’-t-uch…
« Tènoz quî v’la quî, Mossieû l’ajent Mwasse. Ça faît one apéye qui dji n’ vos-a vèyu ? »
« Bondjoû Jèrârd ! »
« Qwè ç’ qui dj’ pou fé por vos ? I-gn-a co yeû on pikèt d’ cwane qu’a trivièrsé vosse vôye ? »
Boute todi, si t’ sâreûs poqwè qui dj’ so véci, ti n’ freûs nin.
« Non.na Jèrârd, ç’èst qui dj’ vôreû bin awè voste idéye. »
Aie ! Si l’ police vént è vosse maujone èt qu’èle vos lome Jèrârd èt nin Jéjé come à s’-t-abitude ; i m’ va co falu ténre à gougne èt n’ wazu causer qui foû d’ mès dints.
« Li police a dandjî d’ mi, asteûre ? La waîte one novèle ! »
« Tot causant d’ novèle, là, Jèrârd, vos-avoz soyu l’afaîre dèl crapôde qu’on-a r’trové stron.néye à Èrnadje ?
« Bin Oyi don Jules, on n’ cause pus qui d’ ça… »
Tén, come ça, ti sarès, qu’ dj’a vèyu clèr dins t’ djeû.
Mwasse s’aveût dit : si lès-autos ont stî djonduwes dins lès-acsidints, lès tchaufeûs âront stî oblidjîs dè l’ catchî au pus rwèd. Èt nin co lès-aler fé r’taper, au grand djoû… Adon poqwè nin Jéjé ?
« Dijoz m’ on pau, là, Jèrârd, gn-a-t-i moyin di r’conèche li marque d’one auto, dijans n’, d’ on gros molén, rén qu’avou dès bokèts d’ lumerote sipiyîs èt dès crénces di coleûr ? »
« Vos mi d’mandoz ça à mî ? Adon qu’ vos labos, vos mètrîn’ on nom su chaque dinréye qui s’ trove dins-one caboléye di pourcia ! »
« C’èst qui, véci, ci n’èst nin one caboléye di pourcia don, Jèrârd, mins bin dèl dispouye d’one pitite crapôde ! »
Jéjé aveût sintu v’nu l’agnon. On n’ lî aveût jamaîs d’mandé po quî, qui r’tapeûve dès-autos. Èt i n’ causeût jamaîs d’ sès pratiques à nèlu. Po ténre botique, i faut sawè s’ taîre èt n’ rén dîre !
« Bin, vos savoz, là, Mossieû Mwasse ; dès-autos djonduwes, i-gn-a co deûs, là pa pa d’vant. Mins dji n’ sé nin da quî qu’ c’èst ! »
« N’eûchiz nin peû. Dji n’ vos l’ dimande nin non pus. Mins ç’ qui dj’ vôreûve bin sawè, c’èst si on vos-a d’mandé d’ fé on’ ovradje ; dîjans n’ dispôy li Noyé ?
« Â bin ça ! I-gn-a yeû one vîye mémé qui m’a v’nu mostrer s’-t-auto l’ djoû dèl Noyé. I-gn-aveût qu’one lumerote di d’dri à r’mète. Djè lî a rèspondu qu’ s’èle vineûve avou lès pîces, dj’ènn’âreû qu’ po dî munutes. »
« C’èst tot ç’ qui dj’ voleû sawè, Jéjé. Nos nos r’veûrans bin rade. Mèrci bran.mint dès côps. »
Jules Mwasse, a ralumé s’ gsm, qu’il aveût distindu po-z-awè sès-aujes do timps qu’il èsteûve avou Jéjé. Il a rademint uké Rossète.
« Alô ! Èwou ç’ qui t’èsteûs co pèté èvôye. nin d’pus su t’ gsm, qu’à t’ maujone, nin moyin d’ t’awè ! Ti m’as dit qu’ ti t’aleûs r’nètî. T’as co one vîye comére à lî prusinter Banban ? »
« Â, Â ! Èt djaloûse avou ça ! »
« Rabroke au pus rwèd, li comissaîre mi tane, Djè lî a dît qui dj’ ratindeû on côp d’ téléfone po lî fé prinde pacyince, mins dji risquéye pèsant s’i s’amin.ne véci. »
« Rén d’ tot ça mi chér plankèt ! Dji v’ veû bin voltî, mins dj’inmereû co mia qu’ vos m’ comandrîz on piquèt po d’mwin tote li djoûrnéye po guignî, sins qu’i n’ si faîye veûy, pa d’vant one maujone au numèrô 13 dèl rouwale Kimin.ne Atot à Lonzéye. Dji rabroke dins cénq munutes, mi chér keûr, po vosse plaîjî !
Il a r’clapé, sins ratinde li rèsponse…