Pou nouzôtes, ça n' è nin k' des bons costès : il ont aspêtchî les mariadjes et les dicåces 40 djous å lon. Tous les poytîs k' avin aprestè des ståvléyes du cokês pou vinde bêzètchir a ces ocåzions la ont fwait kerwéye ; lu pris des cokês vint d' tumer o plantchî (0.75 uroliyårds, al plaece du 1.5 E. l' anéye passéye o minme moumint).
Ça fwait k' les poytîs nu ront nin leus sous ; adon, i n' vinet nin payi l' årtisse ki lz è ahessî avu les vaccins et les drougues (c' est mi, ça, di-st i l' fô). Come ça sît lu disdut dul dioccine - les djins wèyint et choûtint ça al tévé et n' mougnint pupon d' cokê -, et co ene gréve des camioneus, la 5 moe k' ça dère. C' e-st in plan pou taper l' uch su l' bèr. Ûbin du rvinde la fame pou payî ses desses.
Ça fwait k' les 40 djoûs d' dû, a plinne såjon des tourisses, su vont passer sin muzike guêye, minme o posse, les plâdjes cåzu voûdes (les couméres nu wazrin mète in mayot), les orkesses et les apresteus d' marindes ki tchômet djusk' o mwè d' sètimbe. (Brâmint des mariadjes su fjet o mwè d' awousse.)
Tant k' a trovu ene goute du pèket û in vêre du bîre û d' vin du tout c' mwès ci, din les cafès, les otels û les boutikes, kèndale, séss, twè, mon parant ! Les cîs k' ont sté spanis avu in soret ont ça pou leus ûs d’ Påkes. Ça va fé ene piête ossi rède ku la cée dul dioccine pou les Beljes.
Mé on-z espere ku l' nouvê rwè rumètrè ene miete l' eglîje o mitan do viadje. Et po cmincî, duzingnî l' abribance ki poûri et splawniye et brani tout l' payi.
Eplaidî e moes d' setimbe 1999, les målåjheys mots ratournés e francès direk dins l' tecse; li mincion d' l' oteur esteut insi « pa Lucyin Mahin k’êrt su plèce »