L’COULOURDIA DAIN L’BOUTIQUE GRIMARD.
In Coulourdia vudi dès cayaux dé l’carrière,
Estét r’cheu dain l’boutique Grimard ;
Crévant d’foim i cachét, à mingi et à boère.
Dain sés ôstis comme in boyard,
Du fier i n’conn’chét né co l’frime,
Tout rapogi i chai sû n’lime !
Frottant s’vinte i s’adaye rad’moin à agni d’dain,
A d’esquetté s’machoère, à d’esbrigi ses dints !
Mai l’lime li dit : « Joque tu, achoute :
« Woéte à tes dints mannette couloute !
« Quoé vousse ? rin n’mé destrû, i nia quà l’lonque du tins,
« Quand Grimard emm’fai r’lure, l’aci dain sés vèrins,
« Vasé cachi tés crousses, dain s’dresse ou dain s’n’armoère,
« Avét mi, elles sont cuttes ! erprin l’chique et arvoêre. »
Q’lès zargneux, lés gueulards, lés jaloux, plains d’défauts,
Pâle nu, scrive nu, minte nu, conte dés geins comme i faut,
Ça n’fai né pu d’effet, què l’coulourdia sû l’lime ;
On lès leye pou s’qui sont ! lés autes ont nô n’estime !
Conte les zargneux parlét tout haut :
C’est l’diale dain leuwe bénite ! choqui i vont s’desbatte !
Cést q’qui sain rogneu, s’gratte.