24. Pour Li l’zî d’nér ène ôte imaudje : lu Payis d’ pa là hôt, c’è-st-in pô come yink qu’aurot sèmé dul bone blè su s’ tchamp.
25. Maîs non pus, su l’ timps qu’il astot qui dwârmot, gn-è in zigomârd, quu ç’astot higne hagne avu li, k’ è v’nu stramer dul sumince du drauwe avau la spête, èt pîs ç’ côp-là, il è pèté au diâle, lu canvolant !
26. Ây maîs quand la dinrêye è yu créchu, èt qu’èlle è sté pou paumer, wête là qu’i gn-avot dul drauwe pattavau.
27. Lu vaurlèt dul cinse, quand il è yu veû ç’t-ovradje-là, è couru vitemint dîre au cinsî : « Dijèz, ô, nosse mwaîsse, sins volu z-èsse kitchot, n’avîz-v’ nin sèmé toute bone dinrêye su vosse bokèt ? Pa ké sint qu’i gn-è v’nu dul drauwe pattavau ? »
28. Lu cinsî è ruspondu : « C’èst yink qu’èst a margaye avu mi quu c’èst li la cause. » Tossi vite, lu domèstique lî è dmandé : « Vlèz pa dès côps qu’ dj’alinche duzingner cès troûyerîes d’ drauwe-là ? »
29. Lu cinsî è ruspondu : « Nonnè, ô, m’ valèt, nonnè. Si c’èst pou ‘nn aler r’nètier l’ tchamp ç’ saîson-ci, dandjereûs quu v’ rauyerez tostant d’ bone dinrêye quu d’ nichtés.
30. I vaurot mî laîre créchu t’tafwaît jusqu’à l’a.ous’, èt à ç’ moumint-là, dju dîraî à mès-aîdants : « Choûtèz bin, mès djins, i faurè r’lîre la drauwe à fwaît qu’ z-aurez fautché ène bote, èt s’ la radjaveler toute seûle la prèmîre, èt ramèchner lès djavês à ène place pou z-î polu mète lu feû ; pîs adon ç’ côp-là, n’ aurez qu’à radrèsser à l’ supête, loyer, èt fé des crupètes, pour mi ragrègner après su nosse travûre.
sucrît à Pretoria, 29-9-84, a lîjant la Bîbe dins l’ causadje Afrikaans, in vî patwès holandès